ചെന്നൈ : ലോകോ പൈലറ്റിന്‍റെ വേഷം ധരിച്ച്‌ വര്‍ഷങ്ങളോളം ട്രെയിന്‍ ഓടിച്ച യുവാക്കളെ റെയില്‍വേ പോലീസ് പൊക്കി. 17കാരനും 22കാരനായ ഇസ്രാഫിലുമാണ് തട്ടിപ്പിന് അറസ്റ്റിലായത്. ബംഗാളിലെ മൂര്‍ഷിദാബാദ് സ്വദേശികളാണ് ഇരുവരും. ബംഗാളില്‍ നിന്ന് തമിഴ്നാട്ടിലെ ഈറോഡിലേക്ക് ശനിയാഴ്ച ട്രെയിന്‍ ഓടിച്ചെത്തിയപ്പോള്‍ ലോകോ പൈലറ്റ് യൂണിഫോമിലായിരുന്ന ഇവരെ സംശയം തോന്നിയ റെയില്‍വേ പോലീസ് ഫോഴ്സ് അറസ്റ്റ് ചെയ്യുകയായിരുന്നു.
കഴിഞ്ഞ മൂന്നുവര്‍ഷമായി 17കാരന്‍ ട്രെയിന്‍ എന്‍ജിന്‍ ഓടിച്ചിരുന്നതായി പോലീസ് പറഞ്ഞു. മൂന്നുമാസമായി ഇസ്രാഫിലും ട്രെയിന്‍ എന്‍ജിന്‍ പ്രവര്‍ത്തിപ്പിക്കുന്നുണ്ടായിരുന്നു. ലോക്കോ പൈലറ്റുമാരല്ല, ട്രെയിന്‍ നിയന്ത്രിച്ചിരുന്നതെന്ന് തിരിച്ചറിഞ്ഞതോടെ പോലീസ് സേനയും ഞെട്ടിയിരിക്കുകയാണ്. തുടര്‍ന്ന് നടത്തിയ ചോദ്യംചെയ്യലില്‍, ബംഗാളിലെ ഒരു ലോക്കോപൈലറ്റ് ട്രെയിന്‍ ഓടിക്കാനായി ഇരുവര്‍ക്കും പരിശീലനം നല്‍കിയതായി തെളിഞ്ഞു.
‘ബംഗാളില്‍നിന്നുള്ള ഒരു ലോകോ പൈലറ്റ് അസിസ്റ്റന്‍റ് ലോകോ പൈപലറ്റായി ഇരുവരെയും പരിശീലിപ്പിക്കുകയായിരുന്നു. ശേഷം അയാള്‍ക്ക് പകരം ഇരുവരും ചേര്‍ന്ന് ട്രെയിന്‍ ഓടിക്കും. ഗുഡ്സ് ട്രെയിനുകളും പാസഞ്ചര്‍ ട്രെയിനുകളും ഇരുവരും ഓടിച്ചിരുന്നു. യഥാര്‍ഥ ലോകോ പൈലറ്റ് ഇരുവര്‍ക്കും യൂണിഫോമും നെയിം ബാഡ്ജും ലോകോ പൈലറ്റുമാര്‍ ഉപയോഗിക്കുന്ന മറ്റു വസ്തുക്കളും, പണവുംനല്‍കിയിരുന്നു.
