ചങ്ങനാശ്ശേരി : ഡല്ഹിയില് നടക്കുന്ന റിപ്പബ്ലിക് ദിന പരേഡില് പെരുന്ന എന്.എസ്.എസ് കോളേജില് നിന്ന് രണ്ട് കാഡറ്റുകള് പങ്കെടുക്കും. മൂന്നാംവര്ഷ ഫുഡ് സയന്സ് വിദ്യാര്ഥി സൗരവ് എസ്.കുമാര്, രണ്ടാംവര്ഷ വിദ്യാര്ഥിനി രേവതി കൃഷ്ണ എന്നിവരാണ് പങ്കെടുക്കുന്നത്. എന്.സി.സി സീനിയര് അണ്ടര് ഓഫീസര് റാങ്കിലുള്ള സൗരവ് എസ്.കുമാര് തൃക്കോതമംഗലം ശാരദ ഭവനില് സുനില്കുമാറിന്റെയും രേണുകയുടെയും മകനാണ്.
കോര്പറല് റാങ്കിലുള്ള രേവതികൃഷ്ണ പള്ളിക്കത്തോട് കണ്ടത്തില് വീട്ടില് ഗോപാലകൃഷ്ണന് നായരുടെയും ഷൈനി മോളുടെയും മകളാണ്. ഇതിനോടകം ഡല്ഹിയില് എത്തിച്ചേര്ന്ന സംഘം ഉടന് പരിശീലന ക്യാമ്പില് പ്രവേശിക്കും. പ്രധാനമന്ത്രിയുടെ റാലി, സാംസ്കാരിക പരിപാടികള്, വി.വി.ഐ.പി സന്ദര്ശനം എന്നിവയില് സംബന്ധിച്ച് ശേഷം ഫെബ്രുവരിയിലാകും തിരിച്ചെത്തുക. അഭിമാനാര്ഹമായ നേട്ടം കൈവരിച്ച കാഡറ്റുകളെ പ്രിന്സിപ്പല് പ്രഫ. ഡോ. എസ്. സുജാത, ഐ.ക്യു.എ.സി കോഡിനേറ്റര് പ്രഫ. ഡോ. എസ്. അനില് കുമാര്, അസോസിയേറ്റ് എന്.സി.സി ഓഫിസര് ലഫ്. പ്രഫ. ഡോ. പി. സുരേഷ് ബാബു എന്നിവര് അഭിനന്ദിച്ചു.
