മിന്നലിനെ തുടർന്ന് ഫാൻ പൊട്ടിത്തെറിച്ചു ; കൊച്ചു കുട്ടിയുൾപ്പെടെ 2 പേർക്ക് പരുക്ക്

അമയന്നൂർ : മിന്നലിനെ തുടർന്നു വീട്ടിലെ ഫാൻ പൊട്ടിത്തെറിച്ചു വീണ് കൊച്ചു കുട്ടിയുൾപ്പെടെ രണ്ടുപേർക്കു പരുക്കേറ്റു. പൂതിരിക്കൽ പുളിക്കത്തോപ്പിൽ ഇബ്രാഹിം, മകൾ രണ്ടര വയസ്സുകാരി നൂറ ഫാത്തിമ എന്നിവർക്കാണ് പരുക്കേറ്റത്. ഇവരുടെ വീടിനും നാശനഷ്‍‍‌‍‌ടമുണ്ടായി. ഇന്നലെ 3.30യോടെയാണ് സംഭവം. ഫാൻ പൊട്ടിത്തെറിച്ചു ദേഹത്തേക്കു കഷണങ്ങൾ തെറിച്ചു വീണാണ് ഇരുവർക്കും പരുക്കേറ്റത്. ഇബ്രാഹിമിന്റെ കഴുത്തിനു പിന്നിലും കാലിലും നൂറയുടെ കയ്യിലും ഫാനിന്റെ കഷണം തെറിച്ചു വീണു. കുടുംബാംഗങ്ങൾ വീട്ടിൽ സംസാരിക്കുന്നതിനിടെയാണു സംഭവം. ശക്തമായ മിന്നലിൽ വീട്ടിലെ മീറ്ററും വയറിങ്ങും പൂർണമായി കത്തി നശിച്ചു. വീടിന്റെ സിറ്റൗട്ടിലെ ഭിത്തി പൊട്ടുകയും ചെയ്തിട്ടുണ്ട്.