ന്യൂഡൽഹി : ഡൽഹിയിൽ വീണ്ടും ബോംബ് ഭീഷണി. രാജ്യതലസ്ഥാനത്തെ രണ്ട് സ്കൂളുകൾക്കാണ് ഭീഷണി സന്ദേശമെത്തിയത്. ധൗള കുവാനിലെ ആർമി പബ്ലിക് സ്കൂളിനും ലോധി റോഡിലെ എയർഫോഴ്സ് ബാൽ ഭാരതി സ്കൂളിനുമാണ് ബോംബ് ഭീഷണി ലഭിച്ചത്. പോലീസും ബോംബ് സ്ക്വാഡുമെത്തി സ്കൂൾ പരിസരം ഒഴിപ്പിച്ച് സമഗ്രമായ തിരച്ചിൽ നടത്തി. ഇ മെയിൽ വഴിയാണ് ഭീഷണി സന്ദേശമെത്തിയത്.
ഭീഷണി ഇമെയിലുകൾ ലഭിച്ചതിനെത്തുടർന്ന് രണ്ട് സ്കൂളുകളുടെയും അഡ്മിനിസ്ട്രേഷനുകൾ രാവിലെ തന്നെ അധികൃതരെ അറിയിച്ചതായി മുതിർന്ന പോലീസ് ഉദ്യോഗസ്ഥൻ പറഞ്ഞു. ഡോഗ് സ്ക്വാഡ്, ഡൽഹി ഫയർ സർവീസസ് എന്നിവിടങ്ങളിൽ നിന്നുള്ള സംഘങ്ങളും സ്ഥലത്തെത്തി. സ്കൂളുകൾക്ക് ചുറ്റുമുള്ള പ്രദേശങ്ങളും പരിശോധിക്കുന്നുണ്ട്. സംശയാസ്പദമായി ഒന്നും കണ്ടെത്തിയിട്ടില്ലെന്നും വ്യാജ ഭീഷണിയാകാമെന്നും ഉദ്യോഗസ്ഥർ പറഞ്ഞു. ഇമെയിലുകളുടെ ഉറവിടം കണ്ടെത്തുന്നതിന് സൈബർ സെൽ അന്വേഷണം ആരംഭിച്ചിട്ടുണ്ട്.
