തിരുവനന്തപുരം : തിരുവനന്തപുരത്ത് കീം പരീക്ഷ എഴുതിയ രണ്ട് പേര്ക്ക് കോവിഡ്. തൈക്കാട് കേന്ദ്രത്തില് പരീക്ഷ എഴുതിയ പൊഴിയൂര് സ്വദേശിക്കും കരമനയില് പരീക്ഷ എഴുതിയ കരകുളം സ്വദേശിക്കുമാണ് രോഗം. പൊഴിയൂര് സ്വദേശിക്ക് നേരത്തെ രോഗലക്ഷണം ഉണ്ടായിരുന്നതിനാല് പരീക്ഷ എഴുതിയത് പ്രത്യേക മുറിയിലാണ്. അതുകൊണ്ട് മറ്റ് വിദ്യാര്ഥികളുമായി സമ്പര്ക്കമില്ല. എന്നാല് കരകുളം സ്വദേശിക്കൊപ്പം പരീക്ഷ എഴുതിയ 20 പേരെ നിരീക്ഷണത്തിലാക്കി.
ജൂലൈ 16നാണ് പരീക്ഷ നടന്നത്. തിരുവനന്തപുരത്ത് കോവിഡ് വ്യാപനം രൂക്ഷമായതിനാല് പരീക്ഷ മാറ്റിവെയ്ക്കണമെന്ന ആവശ്യമുയര്ന്നിരുന്നു. എന്നാല് സുരക്ഷ ഉറപ്പാക്കി പരീക്ഷ നടത്തുമെന്നാണ് സര്ക്കാര് അറിയിച്ചത്. സാമൂഹ്യ അകലം പാലിക്കാതെ പട്ടം സ്കൂളില് വിദ്യാര്ഥികളും രക്ഷിതാക്കളും തിക്കുംതിരക്കുമുണ്ടാക്കിയതിന്റെ ചിത്രങ്ങള് പുറത്തുവന്നതോടെ ശശി തരൂര് എംപി ഉള്പ്പെടെയുള്ളവര് സര്ക്കാരിനെതിരെ രൂക്ഷവിമര്ശനവുമായി രംഗത്തെത്തുകയും ചെയ്തു.
