തൃശ്ശൂർ : കാഞ്ഞാണിയിൽ നിയന്ത്രണം വിട്ട ബൈക്ക് പിക്കപ്പ് വാനിൽ ഇടിച്ച് രണ്ട് യുവാക്കൾ മരിച്ചു. വാടാനപ്പള്ളി കൊടുവത്തുപറമ്പിൽ സ്വദേശി പ്രണവ്, കരുവന്തല ചുക്കാശ്ശേരി സ്വദേശി അഭിമന്യു എന്നിവരാണ് മരിച്ചത്. ഇന്നലെ രാത്രി 11 മണിയോടെ ഏനാമാവ് റോഡിലെ കെ.എസ്.ഇ.ബി സബ്സ്റ്റേഷന് മുന്നിലായിരുന്നു അപകടം നടന്നത്. നിയന്ത്രണം വിട്ട ബൈക്ക് പിക്കപ്പ് വാനിൽ വന്നിടിക്കുകയായിരുന്നുവെന്ന് ദൃക്സാക്ഷികൾ പറയുന്നു. അപകടസമയത്ത് ബൈക്കിൽ മൂന്ന് പേർ യാത്ര ചെയ്തിരുന്നതായാണ് ലഭിക്കുന്ന വിവരം.
അപകടത്തിൽ പരിക്കേറ്റ ബൈക്കിലുണ്ടായിരുന്ന മറ്റൊരു യുവാവിനെയും പിക്കപ്പ് വാനിലെ ജീവനക്കാരനെയും വാടാനപ്പള്ളിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ആശുപത്രിയിൽ എത്തിക്കുമ്പോഴേക്കും ഒരാളുടെ മരണം സ്ഥിരീകരിച്ചിരുന്നു. രണ്ടാമത്തെയാൾ ചികിത്സയിലിരിക്കെയാണ് മരണത്തിന് കീഴടങ്ങിയത്.
