വാഷിങ്ടൺ : കോവിഡ് വാക്സിന്റെ ബൂസ്റ്റർ ഷോട്ട് സ്വീകരിച്ച് അമേരിക്കൻ പ്രസിഡന്റ് ജോ ബൈഡൻ. ആരോഗ്യ പ്രവർത്തകർ വൈറ്റ് ഹൗസിൽ എത്തിയ ശേഷമാണ് ഫൈസർ വാക്സിന്റെ ബൂസ്റ്റർ ഷോട്ട് ബൈഡന് നൽകിയത്. അമേരിക്കയിലെ പുതുക്കിയ കോവിഡ് മാർഗനിർദേശങ്ങൾ പ്രകാരം 65 വയസ്സ് പിന്നിട്ടവർക്ക് കോവിഡ് വാക്സിന്റെ മൂന്നാമത്തെ കുത്തിവെപ്പായ ബൂസ്റ്റർ ഷോട്ട് നൽകാൻ തീരുമാനിച്ചിരുന്നു.
തന്നെ കണ്ടാൽ തോന്നില്ലെങ്കിലും തനിക്ക് 65 വയസ്സ് കഴിഞ്ഞെന്ന് ബൈഡൻ മാധ്യമങ്ങളോട് പറഞ്ഞു. അമേരിക്കയുടെ ഏറ്റവും പ്രായം കൂടിയ പ്രസിഡന്റുമാരിൽ ഒരാളായ ബൈഡന് ഇപ്പോൾ 78 വയസ്സാണ് പ്രായം. 65 വയസ്സ് പിന്നിട്ടവർക്ക് പുറമെ ഗുരുതരമായ ആരോഗ്യപ്രശ്നങ്ങൾ ഉള്ളവർക്കും വൈറസ് വ്യാപനം കൂടുതലുള്ള പ്രദേശങ്ങളിൽ ജോലി ചെയ്യുന്നവർക്കും ബൂസ്റ്റർ ഡോസ് നൽകാൻ തീരുമാനമായിരുന്നു.
ഇപ്പോഴും വലിയൊരു വിഭാഗം അമേരിക്കക്കാർ വാക്സിൻ സ്വീകരിക്കാൻ വിമുഖത കാണിക്കുകയാണെന്ന് ബൈഡൻ പറഞ്ഞു. ഇത്തരക്കാർ മാരകമായ ഡെൽറ്റ വൈറസിനെ രാജ്യം മുഴുവൻ വ്യാപിക്കാൻ സഹായിക്കുകയാണ് ചെയ്യുന്നത്. ജനസംഖ്യയുടെ 77 ശതമാനം വരുന്ന ജനങ്ങൾ വാക്സിൻ സ്വീകരിച്ചെങ്കിലും വൈറസ് വ്യാപനത്തിന് തടയിടാൻ അത് മതിയാകില്ലെന്നും ബൈഡൻ പറഞ്ഞു.