അബുദാബി : രാജ്യത്തിന്റെ വികസനത്തിനായുള്ള ആസൂത്രണത്തിൽ ശ്രദ്ധേയമായ മുന്നേറ്റംനടത്തി യു.എ.ഇ. ന്യൂസ് വീൽ വിന്റേജ് ഇന്റർനാഷണൽ, സ്വിസ് ഹൊറിസോൺ ഗ്രൂപ്പ് എന്നിവയുടെ ഫ്യൂച്ചർ പോസിബിലിറ്റി ഇൻഡക്സ് (എഫ്.പി.ഐ.) റിപ്പോർട്ട് പ്രകാരം 20 സൂചകങ്ങളിൽ ആഗോളതലത്തിൽ യു.എ.ഇ.ക്ക് ഒന്നാംസ്ഥാനമുണ്ട്. മൊത്തത്തിലുള്ള എഫ്.പി.ഐ. റാങ്കിങ്ങിൽ അറബ് മേഖലയിൽ ഒന്നാംസ്ഥാനവുമുണ്ട്. ഗവൺമെന്റ് വിഷൻ ഇൻഡക്സിൽ ആഗോളതലത്തിൽ ഒന്നാംസ്ഥാനത്താണ് യു.എ.ഇ. സർക്കാർ. സംരംഭങ്ങൾക്ക് പിന്തുണ നൽകുന്ന സർക്കാരുകളുടെ പട്ടികയിൽ രണ്ടാംസ്ഥാനവും ദീർഘകാല ഭാവിപദ്ധതികൾ ആസൂത്രണം ചെയ്യുന്നതിൽ ആഗോളതലത്തിൽ മൂന്നാംസ്ഥാനവും യു.എ.ഇ.ക്കുണ്ട്.
സമഗ്ര വികസനത്തിന്റെ അടിസ്ഥാനം നവീകരണമാണെന്ന കാഴ്ചപ്പാടാണ് രാജ്യം മുന്നോട്ട് വെക്കുന്നതെന്ന് വിദഗ്ധർ വിലയിരുത്തുന്നു. രാജ്യത്തിന്റെ വികസനം ത്വരപ്പെടുത്താനും എല്ലാ മേഖലകൾക്കും അനുയോജ്യമായ ഒരു ലക്ഷ്യസ്ഥാനമായി യു.എ.ഇ.യെ ഉയർത്താനുമാണ് നേതൃത്വം ലക്ഷ്യമിടുന്നത്. മാറ്റങ്ങളോടുള്ള സർക്കാരിന്റെ പ്രതികരണങ്ങൾ, ഭാവി നയങ്ങൾ, സർക്കാർ സംരംഭങ്ങൾ ആരംഭിക്കൽ തുടങ്ങിയവയുടെ അടിസ്ഥാനത്തിൽ രാജ്യം ലോക ശ്രദ്ധയാകർഷിക്കുകയാണ്.
