ബംഗളൂരു : കര്ണാടക ഭക്ഷ്യ-പൊതുവിതരണ വകുപ്പ് മന്ത്രിയും ബിജെപി നേതാവുമായ ഉമേഷ് കട്ടി അന്തരിച്ചു.ബംഗളൂരുവിലെ ആശുപത്രിയില് ഹൃദയാഘാതത്തെ തുടര്ന്നായിരുന്നു അന്ത്യം. 61 വയസായിരുന്നു. ബസവരാജ് ബൊമ്മൈ മന്ത്രിസഭയിലെ ഏറ്റവും മുതിര്ന്ന അംഗമായ കട്ടി ഹുക്കേരി മണ്ഡലത്തിലെ ജനപ്രതിനിധിയാണ്.
എംഎല്എ ആയിരുന്ന പിതാവ് വിശ്വനാഥ് കട്ടിയുടെ നിര്യാണെത്തുടര്ന്ന് നടന്ന 1985-ലെ ഉപതെരഞ്ഞെടുപ്പില് വിജയിച്ചാണ് രാഷ്ട്രീയത്തില് സജീവമായത്. ഹുക്കേരിയിലെ ബെല്ലാബഗേവാഡി ഗ്രാമത്തില് ജനിച്ച കട്ടി ജനതാ പാര്ട്ടിയിലൂടെയാണ് രാഷ്ട്രീയപ്രവര്ത്തനം ആരംഭിച്ചത്. പിന്നീട് ജനതാദള്, ജനതാദള് യുണൈറ്റഡ്, കോണ്ഗ്രസ് പാര്ട്ടികളിലും പ്രവര്ത്തിച്ച ശേഷമാണ് ബിജെപിയില് അംഗമായത്.
