പത്തനംതിട്ട : പ്രഖ്യാപിത വൈദ്യുതി മുടക്കത്തിന് പുറമേ പത്തനംതിട്ട ജില്ലയുടെ വിവിധ ഭാഗങ്ങളില് അപ്രതീക്ഷിതമായി കരണ്ട് പോകുന്നതും വോള്ട്ടേജ് ക്ഷാമത്തിനും ഇലക്ട്രോണിക് ഉപകരണങ്ങളുടെ നാശത്തിനും കാരണമാകുന്നതായി പരാതി. ജില്ലയുടെ കിഴക്കന് മലയോര പ്രദേശങ്ങളിലാണ് ഇത്തരത്തില് വൈദ്യുതി മുടങ്ങുന്നത്. ഇതിനോടൊപ്പം വോള്ട്ടേജില് ഉണ്ടാകുന്ന വ്യതിയാനവും ഗ്രഹോപകരണങ്ങളുടെയും ലൈറ്റുകളുടെയും നാശത്തിന് കാരണമായി മാറുന്നുണ്ട്. കാറ്റും മഴയും ഇല്ലാത്തപ്പോള് പോലും ജില്ലയുടെ വിവിധ ഇടങ്ങളില് വൈദ്യുതി മുടങ്ങുന്നത് പതിവാകുകയാണ്.
സംസ്ഥാനത്ത് പ്രഖ്യാപിത പവര്കട്ട് ഏര്പ്പെടുത്തിയിട്ടുണ്ടെങ്കിലും ജില്ലയില് പവര്കട്ടിന് കൃത്യമായ സമയമില്ലെന്നാണ് ജനങ്ങള് പറയുന്നത്. ഇതിനാല് തന്നെ ഏത് നിമിഷം കറണ്ട് പോകുമെന്ന് ആര്ക്കും പറയുവാനും കഴിയില്ല. വോള്ട്ടേജ് വ്യതിയാനം കാരണം ജില്ലയില് നിരവധി ഗ്രഹോപകരണങ്ങളാണ് തകരാറില് ആയിട്ടുള്ളത്. വോള്ട്ടേജ് വ്യതിയാനം കാരണം ഇത്തരത്തില് ഉപകരണങ്ങള്ക്ക് നാശം നേരിട്ടാല് ആര്ക്കും നഷ്ടപരിഹാരവും ലഭിക്കില്ല. ഫ്രിഡ്ജ്, റ്റി.വി, വാഷിംഗ് മെഷീന്, ഗ്രൈന്റര്, കിണറിലെ മോട്ടോറുകള് എന്നിവ അടക്കമുള്ള നിരവധി ഉപകരണങ്ങളാണ് ജില്ലയിലെ വിവിധ വീടുകളില് നശിച്ച് പോയത്.
അടിക്കടി കറണ്ട് പോകുന്നതും വോള്ട്ടേജ് ക്ഷാമവും അടക്കമുള്ള പരാതികള് പറയാന് ജില്ലയിലെ കെ.എസ്.ഇ.ബി ഓഫീസുകളില് വിളിച്ചാല് ആരും മറുപടി നല്കാറില്ല എന്നും പരാതിയുണ്ട്. പവര്കട്ടും വോള്ട്ടേജ് ക്ഷാമവും വിദ്യാര്ഥികളുടെ പഠനത്തെയും സാരമായി ബാധിക്കുന്നുണ്ട്. മലയോര മേഖകളില് കറണ്ട് പോയാല് മണിക്കൂറുകള് കഴിഞ്ഞാണ് തിരികെ വരിക. രാത്രി സമയങ്ങളില് മലയോര മേഖകളില് കറണ്ട് പോയാല് കെ.എസ്.ഇ.ബി അധികൃതരെ അറിയിച്ചാലും ആരും തകരാര് പരിഹരിക്കാന് തയ്യാറാകുന്നില്ല എന്നും പരാതിയുണ്ട്.
