കോഴിക്കോട് : താമരശ്ശേരി ചുരത്തില് ഒന്പതാം വളവിന് സമീപം വനപ്രദേശത്ത് കണ്ടെത്തിയ മൃതദേഹം തിരിച്ചറിഞ്ഞു. കൊട്ടാരക്കര കുന്നത്തൂര് രാജേഷ് ഭവനത്തില് രാജുവിന്റെ മകന് രാജേഷിന്റെ മൃതദേഹമാണ് വൈകിട്ട് ആറുമണിയോടെ ചുരത്തില് കണ്ടെത്തിയത്. ബസ് യാത്രക്കാരാണ് ആദ്യം യുവാവ് മരിച്ച നിലയില് കിടക്കുന്നത് കണ്ടത് .
വിവരമറിഞ്ഞതിനെ തുടര്ന്ന് ചുരം സംരക്ഷണ സമിതി പ്രവര്ത്തകരും പോലീസും സ്ഥലത്തെത്തി. മൃതദേഹത്തിന് ഒരു ദിവസത്തെ പഴക്കമാണുണ്ടായിരുന്നത്. സമീപത്ത് നിന്ന് ബാഗും ലഭിച്ചിരുന്നു. മൃതദേഹത്തില് നിന്നും ലഭിച്ച മൊബൈലില് നിന്നാണ് മൃതദേഹം തിരിച്ചറിയുന്നതിനുള്ള നമ്പര് ലഭിച്ചത്. മൃതദേഹം കോഴിക്കോട് മെഡിക്കല് കോളേജ് ആശുപത്രി മോര്ച്ചറിയിലേക്ക് മാറ്റി.
