ലക്നൗ: ഉത്തര് പ്രദേശില് ക്രൂയിസര് വാന് ട്രക്കിലിടിച്ച് അഞ്ച് തൊഴിലാളികള് മരിച്ചു. 14 പേര്ക്ക് പരുക്കേറ്റു. ലോക്ഡൗണിനെ തുടര്ന്ന് നാട്ടിലേക്കു പോയ തൊഴിലാളികള് ജോലിസ്ഥലത്തേക്ക് തിരിച്ചു വരുന്നതിനിടെയാണ് അപകടമുണ്ടായത്. ബീഹാറില് നിന്ന് ഹരിയാനയിലെ അംബാലയിലേക്ക് പോകുകയായിരുന്ന തൊഴിലാളികളാണ് അപകടത്തില്പ്പെട്ടത്. പയാഗ്പൂരിലെ സുകായ് പൂര്വ ക്രോസിംഗിന് സമീപം റോഡരികില് നിര്ത്തിയിട്ടിരുന്ന സ്റ്റേഷണറി ട്രക്കിലേക്ക് തൊഴിലാളികള് സഞ്ചരിച്ച ഫോഴ്സ് ക്രൂയിസര് വാന് ഇടിക്കുകയായിരുന്നു. രണ്ടുപേര് സംഭവസ്ഥലത്തു തന്നെ മരിച്ചു. ആശുപത്രിയിലെത്തിച്ച ശേഷമാണ് മൂന്നുപേര് മരിച്ചത്. ജിതേന്ദ്ര ഗിരി, കാഞ്ചന് റാം, സഞ്ജയ് പ്രസാദ്, ബീഹാറില് നിന്നുള്ള ബസന്ത് പ്രസാദ്, ഉത്തര്പ്രദേശിലെ ഗോണ്ടയില് നിന്നുള്ള പവന് എന്നിവരാണ് മരിച്ചത്.
