ഡെറാഡൂണ് : ഉത്തരാഖണ്ഡിലെ റായ്പൂര് ബ്ലോക്കില് മേഘവിസ്ഫോടനം ഉണ്ടായതായി റിപ്പോര്ട്ട്. വെള്ളിയാഴ്ച പുലര്ച്ചെ 2.45ഓടെ ഡെറാഡൂണിലെ സര്ഖേത് ഗ്രാമത്തിലാണ് മേഘവിസ്ഫോടനം ഉണ്ടായതെന്ന് അധികൃതര് അറിയിച്ചു. ഗ്രാമത്തില് കുടുങ്ങിയ എല്ലാ ആളുകളെയും രക്ഷപ്പെടുത്തിയതായും ചിലര് അടുത്തുള്ള റിസോര്ട്ടില് അഭയം പ്രാപിച്ചതായും ദുരന്തനിവാരണസേന അറിയിച്ചു.
അതേസമയം ജമ്മു -കശ്മീരിലെ കത്രയില് കനത്ത മഴയിലുണ്ടായ വെള്ളപ്പൊക്കത്തെ തുടര്ന്ന് മാതാ വൈഷ്ണോ ദേവി ക്ഷേത്രത്തിലേക്കുള്ള യാത്ര താല്കാലികമായി നിര്ത്തി വെച്ചിരുന്നു. പിന്നീട് ഇത് പുനഃസ്ഥാപിച്ചു. നേരത്തെ അമര്നാഥിലും മേഘവിസ്ഫോടനം റിപ്പോര്ട്ട് ചെയ്തിരുന്നു. തുടര്ന്ന് സൈന്യത്തിന്റെ നേതൃത്വത്തില് രക്ഷാപ്രവര്ത്തനം നടത്തുകയും പ്രദേശത്ത് കുടുങ്ങിയ തീര്ഥാടകരെ പുറത്തെത്തിക്കുകയുമായിരുന്നു.
