പാരമ്പര്യ തനിമയില്‍ ഉത്രാട കിഴി സമര്‍പ്പണം നടന്നു

കോട്ടയം : വയസ്കര രാജ്ഭവനിലെ സൗമ്യവതി തമ്പുരാട്ടിക്ക് ഉത്രാടക്കിഴി സമര്‍പ്പിച്ചു. രാജ ഭരണകാലത്ത് നടന്നുവന്ന ഉത്രാടക്കിഴി സമർപ്പണത്തിന്‍റെ പാരമ്പര്യമാണിത്. സര്‍ക്കാറിനുവേണ്ടി മന്ത്രി വി.എൻ വാസവൻ ആണ് കൊച്ചി രാജകുടുംബത്തിലെ പിന്മുറക്കാരിയായ സൗമ്യവതി തമ്പുരാട്ടിക്ക് ഉത്രാടക്കിഴി കൈമാറിയത്. ഇന്ന് രാവിലെ 11ന് വയസ്കര കുന്നിലെ വീട്ടിലെത്തിയാണ് മന്ത്രി കിഴി സമർപ്പിച്ചത്. തിരുവഞ്ചൂർ രാധാകൃഷ്ണൻ എം.എൽ.എയും സന്നിഹിതനായിരുന്നു. കൊച്ചി രാജ വംശത്തിലെ പിൻമുറക്കാരിയായ സൗമ്യവതി തമ്പുരാട്ടിക്ക് ഓണത്തിന് പുതുവസ്ത്രം വാങ്ങാനാണ് തുക നൽകുന്നത്.