തിരുവനന്തപുരം : സർവകലാശാലകളിലെ വൈസ് ചാൻസലർ നിയമനത്തിൽ ചാൻസലർക്ക് സമ്പൂർണാധികാരം നൽകുന്ന ചട്ടഭേദഗതിക്കൊരുങ്ങി യു.ജി.സി. കേരളമടക്കമുള്ള സംസ്ഥാനങ്ങളിലെ വി.സി. നിയമനങ്ങൾ തുടർച്ചയായി കോടതികയറുന്ന പശ്ചാത്തലത്തിലാണ് ഈ നീക്കം. വി.സി. നിയമനത്തിനുള്ള സെർച്ച് കമ്മിറ്റി ഉൾപ്പെടെയുള്ള നടപടിക്രമങ്ങളിൽ ഇപ്പോൾ ഏതുവിധത്തിലും വ്യാഖ്യാനിക്കാവുന്ന വ്യക്തമല്ലാത്ത ഭാഗങ്ങളിൽ (ഗ്രേ ഏരിയ) സ്പഷ്ടീകരണം വരുത്തുന്ന ചട്ടഭേദഗതി വൈകാതെ പുറത്തിറക്കും.
കേരളത്തിൽ നിലവിൽ ഗവർണറാണ് ചാൻസലർ. 2018-ൽ യു.ജി.സി. പുറത്തിറക്കിയ ചട്ടമനുസരിച്ചാണ് വി.സി. നിയമനം. ഗവർണർ-സർക്കാർ തർക്കത്തിനിടെ, യു.ജി.സി. ചട്ടം സർവകലാശാലാ നിയമങ്ങൾക്കു വിരുദ്ധമാണെന്ന വാദവും ശക്തമായി. ഈ പ്രശ്നത്തിൽ ഉടക്കിനിൽക്കുകയാണ് നിയമനങ്ങൾ.
