തിരുവനന്തപുരം: സംസ്ഥാനത്തിന്റെ കടമെടുപ്പ് പരിധി വെട്ടിക്കുറച്ചതിന് പിന്നാലെ സംസ്ഥാന സര്ക്കാറിനെ പരിഹസിച്ച് കേന്ദ്രമന്ത്രി വി മുരളീധരന്. സംസ്ഥാനം വായ്പയെടുക്കുന്നത് എന്തിനാണ് കെ വി തോമസിന് ഓണറേറിയം നല്കാനാണോ എന്ന് മുരളീധരന് പരിഹസിച്ചു. മന്ത്രിമാര്ക്ക് ധൂര്ത്തടിക്കാനും വിനോദസഞ്ചാരത്തിനുമാണോ വായ്പയെടുക്കുന്നത്. കേരളത്തിന്റെ സാമ്പത്തിക സ്ഥിതി സംസ്ഥാന സര്ക്കാര് വ്യക്തമാക്കണമെന്നും മുരളീധരന് ആവശ്യപ്പെട്ടു. വന്യമൃഗങ്ങളെ സംരക്ഷിയ്ക്കാന് കേന്ദ്രം അനുവദിച്ച പണം സംസ്ഥാനം വേണ്ട രീതിയില് ഉപയോഗിക്കാത്തതാണ് അരിക്കൊമ്പന് അടക്കമുള്ള വിഷയങ്ങള്ക്ക് കാരണമെന്നും വി മുരളീധരന് പറഞ്ഞു.
അതേസമയം കടമെടുപ്പ് പരിധി വെട്ടിക്കുറച്ച കേന്ദ്ര സര്ക്കാര് നടപടി കേരളത്തോടുള്ള യുദ്ധ പ്രഖ്യാപനമാണെന്ന് എഎ റഹീം എംപി പറഞ്ഞു. ഭരണഘടന ഉറപ്പ് നല്കുന്ന ഫെഡറല് തത്വങ്ങള്ക്കെതിരാണ് കേരളത്തോടുള്ള വിവേചനം. കേരളത്തെ ശ്വാസം മുട്ടിക്കുക എന്നതാണ് കഴിഞ്ഞ കുറെ നാളുകളായി കേന്ദ്ര സര്ക്കാരിന്റെ സമീപനമെന്നും റഹീം വിമര്ശിച്ചു. സര്ക്കാര് ഗ്യാരണ്ടി മാത്രം നല്കിയ കിഫ്ബി, പെന്ഷന് ഫണ്ട് തുടങ്ങിയവ വഴിയുളള കടമെടുപ്പ് ചൂണ്ടിക്കാട്ടിയാണ് കേന്ദ്രസര്ക്കാറിന്റെ വിചിത്രമായ നടപടിയെന്നും അദ്ദേഹം പറഞ്ഞു.
