പാലക്കാട്: വടക്കഞ്ചേരിയില്‍ ദമ്പതികളെ കെട്ടിയിട്ട് കവര്‍ച്ച നടത്തിയ കേസില്‍ ആറുപേര്‍ പിടിയില്‍. രണ്ട് സ്ത്രീകള്‍ ഉള്‍പ്പെടെ പിടിയിലായ എല്ലാവരും തമിഴ്‌നാട് സ്വദേശികളാണ്. സെപ്റ്റംബര്‍ 22നാണ് ചുവട്ടുപാടം സ്വദേശിയായ സാമിനെയും ഭാര്യയെയും സംഘം കെട്ടിയിട്ട് കവര്‍ച്ച നടത്തിയത്. 25 പവനും പതിനായിരം രൂപയുമാണ് സംഘം കവര്‍ന്നത്. സിസിടിവി ദൃശ്യങ്ങളും ഫോണ്‍ വിളിയും പിന്തുടര്‍ന്ന് വടക്കഞ്ചേരി പോലീസ് അന്വേഷണം നടത്തിയത്. പരുക്കേറ്റ ചുവട്ടുപാടം സ്വദേശി സാം പി.ജോണ്‍, ഭാര്യ ജോളി എന്നിവര്‍ തൃശൂരിലെ സ്വകാര്യ ആശുപത്രിയില്‍ ചികില്‍സയിലാണ്.
ദേശീയപാതയോട് ചേര്‍ന്നുള്ള വീടാണ് സാമിന്റേത്. വാഹനത്തിലെത്തിയ സംഘം തുടര്‍ച്ചയായി ഹോണടിച്ചു. വാതില്‍ തുറന്നതിന് പിന്നാലെ സംഘം വീട്ടില്‍ക്കയറി. ദമ്പതികളെ കെട്ടിയിട്ട ശേഷം സ്വര്‍ണവും പണവും കവര്‍ന്നുവെന്നാണ് സാം പി ജോണിന്റെ മൊഴി. അലമാരയുടെ താക്കോല്‍ നിര്‍ബന്ധിച്ച് വാങ്ങിയ ശേഷമാണ് ഇരുപത്തി അഞ്ച് പവന്‍ സ്വര്‍ണാഭരണങ്ങളും മൊബൈല്‍ ഫോണും പണവും കവര്‍ന്നത്.
ആക്രമിച്ചവര്‍ ഹിന്ദിയിലാണ് സംസാരിച്ചിരുന്നതെന്ന വിവരം പോലീസ് പ്രത്യേകം പരിശോധിക്കുന്നുണ്ട്. സംഘം മടങ്ങിയതിന് പിന്നാലെ കവര്‍ച്ചയ്ക്ക് ഇരയായവര്‍ തന്നെയാണ് ബന്ധുക്കളെയും പോലീസിനെയും വിവരമറിയിച്ചത്. കവര്‍ച്ചയ്ക്കിരയായവരുടെ മൊഴിയും ദൃശ്യങ്ങളുമാണ് ആറുപേരടങ്ങുന്ന സംഘമെന്ന വിലയിരുത്തിലിലേക്ക് പോലീസ് എത്തിയത്.
