വടശ്ശേരിക്കര : പത്തനംതിട്ട ജില്ലയിലെ പരിസ്ഥിതിലോല മേഖല സംബന്ധിച്ച കരട് വിജ്ഞാപനത്തിലുള്പ്പെട്ട വടശ്ശേരിക്കര വില്ലേജിനെ പൂർണ്ണമായും ഒഴിവാക്കണമെന്ന് കേരള കോൺഗ്രസ് (എം) വടശ്ശേരിക്കര മണ്ഡലം കമ്മിറ്റി ആവശ്യപ്പെട്ടു. വടശ്ശേരിക്കര മേഖലയിലെ ജനവാസ കേന്ദ്രങ്ങളും കൃഷിയിടങ്ങളുമുള്പ്പെടെയുള്ള പ്രദേശങ്ങൾ ഇ.എസ്.എ. പട്ടികയിൽ വന്നതിൽ കർഷകർ ആശങ്കയിലാണ്. ഇ.എസ്.എ. പരിധിയിൽ നിയന്ത്രണങ്ങൾ വന്നാൽ കൃഷി, നിർമ്മാണം, ഭൂവിനിയോഗം തുടങ്ങിയ മേഖലകളിൽ നിയന്ത്രണങ്ങള് വരികയും കാർഷിക മേഖലയായ വടശ്ശേരിക്കരയിലെ ജനങ്ങളെ ദുരിതത്തിലേക്ക് നയിക്കുകയും ചെയ്യും. ഈ സാഹചര്യത്തിൽ സംസ്ഥാന സർക്കാർ അടിയന്തിര നടപടികൾ സ്വീകരിക്കണമെന്ന് യോഗം ആവശ്യപ്പെട്ടു. അല്ലാത്തപക്ഷം പ്രക്ഷോഭ പരിപാടികൾ സംഘടിപ്പിക്കുവാനും യോഗം തീരുമാനിച്ചു.
കേരള കോൺഗ്രസ് (എം) ഉന്നതാധികാര സമിതി അംഗം അഡ്വ.പ്രമോദ് നാരായൺ യോഗം ഉദ്ഘാടനം ചെയ്തു. മണ്ഡലം പ്രസിഡന്റ് ശോഭന എൻ.എസ്. അധ്യക്ഷത വഹിച്ചു. നിയോജകമണ്ഡലം പ്രസിഡന്റ് ജോർജ്ജ് എബ്രഹാം, ജില്ലാ സെക്രട്ടറിമാരായ ബിബിൻ കല്ലംപറമ്പിൽ, ഷെറി തോമസ്, ദളിത് ഫ്രണ്ട് സംസ്ഥാന ജനറൽ സെക്രട്ടറി എം.സി.ജയകുമാർ, നിയോജകമണ്ഡലം വൈസ് പ്രസിഡന്റ് സാബു കുറ്റിയിൽ, മണ്ഡലം സെക്രട്ടറി അനൂപ് എബ്രഹാം, മുൻ മണ്ഡലം പ്രസിഡണ്ട് ജോസ് മാലിയിൽ, ജില്ലാ കമ്മിറ്റി അംഗങ്ങളായ കോശി കുരുടമണ്ണിൽ, അനീന സാമുവേൽ, മോനായി തോട്ടുങ്കൽ, മോഹനൻ മടക്കമൂട്, വിനോദ് സി.വി., മോഹിനി, ആമിന, സബീന, പ്രസാദ്, ഷിജു മോൻ, സുനിത, സിഞ്ചു പ്രകാശ് എന്നിവർ പ്രസംഗിച്ചു.
