കോഴഞ്ചേരി : ആറന്മുള ഉത്രട്ടാതി വള്ളംകളിയിൽ പങ്കെടുക്കുന്ന പള്ളിയോടങ്ങളിൽ പാടാറുള്ള വള്ളപ്പാട്ടുകൾ പുതിയ തലമുറയെ അഭ്യസിപ്പിക്കുന്നതിനായി വഞ്ചിപ്പാട്ട് പഠന കളരി സംഘടിപ്പിക്കുന്നു. ആറന്മുള പള്ളിയോട സേവാസംഘവും ജില്ലാപഞ്ചായത്തും ചേർന്ന് സംഘടിപ്പിക്കുന്ന പഠന കളരി 13, 14, 16 തീയതികളിലായി നടക്കും. പമ്പയുടെ ഇരുകരകളിലായി 52 പള്ളിയോടക്കരകളെ മൂന്ന് മേഖലകളായി തിരിച്ച് പ്രത്യേകം ക്ലാസുകളുണ്ടാകും. പഠന കളരിയിൽ പങ്കെടുക്കുന്ന കുട്ടികളുടെ വഞ്ചിപ്പാട്ട് സമർപ്പണം 16-ന് രാവിലെ ആറന്മുള ക്ഷേത്രസന്നിധിയിൽ നടത്തും.
പഠന കളരിയുടെ ജനറൽ കൺവീനറായി എം.കെ.ശശികുമാറിനെ(കീഴവന്മഴി) തിരഞ്ഞെടുത്തു. കിഴക്കൻമേഖല കൺവീനർ കെ.ആർ.സന്തോഷ് (കീക്കൊഴൂർ-വയലത്തല), മധ്യമേഖല കൺവീനർ പി.വിജയ് കുമാർ (ഇടയാറന്മുള), പടിഞ്ഞാറൻ മേഖലാ കൺവീനർ ഡോ. ജി.സുരേഷ് ബാബു(വെൺപാല) എന്നിവരെ ചുമതലപ്പെടുത്തി. മേഖലാ സമ്മേളനങ്ങളിൽ പള്ളിയോട സേവാ സംഘം പ്രസിഡന്റ് കെ.വി.സാംബദേവൻ, സെക്രട്ടറി പ്രസാദ് ആനന്ദ്ഭവൻ, ഖജാൻജി രമേശ് കുമാർ മാലിമേൽ, വൈസ് പ്രസിഡന്റ് കെ.എസ്.സുരേഷ്, ജോയിന്റ് സെക്രട്ടറി അജയ് ഗോപിനാഥ് എന്നിവർ നേതൃത്വം നൽകും.
