പാലക്കാട്: വന്ദേഭാരതില് കോണ്ഗ്രസ് പ്രവര്ത്തകര് പോസ്റ്ററുകള് ഒട്ടിച്ച് വൃത്തികേടാക്കി. വന്ദേഭാരത് ഷൊര്ണൂരില് നിര്ത്തിയപ്പോള് വികെ ശ്രീകണ്ഠന് എംപിയ്ക്ക് അഭിവാദ്യമര്പ്പിച്ച് പോസ്റ്ററുകള് കോണ്ഗ്രസ് പ്രവര്ത്തകര് ഒട്ടിക്കുകയായിരുന്നു. അതേസമയം വന്ദേഭാരത് ട്രെയിന് ഷൊര്ണൂരില് സ്റ്റോപ്പ് അനുവദിക്കണമെന്നാവശ്യപ്പെട്ട് ശ്രീകണ്ഠന് എംപി രംഗത്തെത്തിയിരുന്നു. ഷൊര്ണൂരില് സ്റ്റോപ്പ് അനുവദിച്ചില്ലെങ്കില് വന്ദേഭാരത് ട്രെയിന് തടയുമെന്നും എംപി പറഞ്ഞിരുന്നു.
പ്രധാനമന്ത്രി സെന്ട്രല് സ്റ്റേഡിയത്തില് നിന്ന് ഫ്ളാഗ് ഓഫ് ചെയ്തതോടെയാണ് കേരളത്തില് വന്ദേഭാരത് യാത്ര ആരംഭിച്ചത്. ഇന്ന് ഉച്ചയ്ക്ക് 11.30 ഓടെയാണ് പ്രധാനമന്ത്രി വന്ദേ ഭാരത് ഫ്ളാഗ് ഓഫ് ചെയ്തത്. പ്രത്യേകം ക്ഷണം ലഭിച്ച യാത്രക്കാരും, മതമേലധ്യക്ഷന്മാരും, മാധ്യമ പ്രവര്ത്തകരുമാണ് ആദ്യ വന്ദേ ഭാരത് എകസ്പ്രസില് ഇടംനേടിയത്. മുഖ്യമന്ത്രി പിണറായി വിജയന്, ഗവര്ണര് ആരിഫ് മുഹമ്മദ് ഖാന്, ശശി തരൂര് എംപി എന്നിവരുടെ സാന്നിധ്യത്തിലാണ് പ്രധാനമന്ത്രി ഫ്ലാഗ് ഓഫ് ചെയ്തത്. തുടര്ന്ന് യാത്രക്കാരുമായി വന്ദേ ഭാരത് ആദ്യ സര്വീസ് ആരംഭിച്ചു.
