കൊച്ചി: സര്ക്കാരിന്റെ രണ്ടാം വാര്ഷികാഘോഷ പരിപാടികളോട് പ്രതിപക്ഷം സഹകരിക്കില്ലെന്ന് പ്രതിപക്ഷ നേതാവ് വി.ഡി. സതീശന്. ജനങ്ങള്ക്കുമേല് നികുതിഭാരം അടിച്ചേല്പ്പിച്ചെന്ന് ആരോപിച്ചാണ് പരിപാടികളോട് നിസഹകരിക്കാനുള്ള തീരുമാനം. ജനജീവിതം കൂടുതല് ദുസഹമാകുന്ന അതേദിവസം തന്നെ സംസ്ഥാന സര്ക്കാരിന്റെ വാര്ഷികാഘോഷ പരിപാടികള് തുടങ്ങുന്നുവെന്നത് ഏറ്റവും വലിയ വിരോധാഭാസമാണെന്നും സതീശന് പരിഹസിച്ചു.
അതേസമയം സര്ക്കാര് വാര്ഷികാഘോഷത്തിന് ഖജനാവില് തൊടരുതെന്ന് കെ സുധാകരന് പറഞ്ഞു. കനത്ത നികുതികളും കടുത്ത സാമ്പത്തിക തകര്ച്ചയും ജനങ്ങള് നേരിടുമ്പോള് 50 കോടിയിലധികം രൂപ ഖജനാവില്നിന്നു മുടക്കി സര്ക്കാര് വാര്ഷികം ആഘോഷിക്കുന്നത് അത്താഴപ്പട്ടിണിക്കാരുടെ നെഞ്ചില് കയറിനിന്ന് ചവിട്ടുനാടകം കളിക്കുന്നതിന് തുല്യമാണെന്ന് സുധാകരന് കുറ്റപ്പെടുത്തി.
