കൊച്ചി : തൃക്കാക്കര ഉപതെരഞ്ഞെടുപ്പിലേക്ക് സഭയെ വലിച്ചിഴച്ചത് സിപിഎം ആണെന്ന് പ്രതിപക്ഷ നേതാവ് വി.ഡി സതീശന്. ജോ ജോസഫ് സഭയുടെ സ്ഥാനാര്ഥിയാണെന്ന് ഒരു ഘട്ടത്തിലും പറഞ്ഞിട്ടില്ലെന്നും പ്രതിപക്ഷ നേതാവ് വ്യക്തമാക്കി. ഇത്തരമൊരു സ്ഥാനാര്ഥി പ്രഖ്യാപനം സിപിഎമ്മില് ഇതാദ്യമാണ്. സഭയുടെ സ്ഥാപനത്തില് വച്ചാണ് സിപിഎം സ്ഥാനാര്ഥി പ്രഖ്യാപനം നടത്തിയതെന്നും വി.ഡി സതീശന് പറഞ്ഞു. അതേസമയം, എല്ഡിഎഫ് സ്ഥാനാര്ഥി നിര്ണയവുമായി സീറോ മലബാര് സഭയെ ബന്ധപ്പെടുത്താന് നടത്തുന്ന പ്രചാരണ ശ്രമങ്ങള്ക്കെതിരേ കോണ്ഗ്രസ് നേതാക്കളായ രമേശ് ചെന്നിത്തലയും ഡൊമിനിക് പ്രസന്റേഷനും രംഗത്തെത്തിയിരുന്നു.
സ്ഥാനാര്ഥിയെ സഭ നിശ്ചയിക്കുമെന്നു കരുതുന്നില്ല. ഇത്തരം കാര്യങ്ങളില് ഇടപെടുന്ന ആളല്ല കര്ദിനാള് ജോര്ജ് ആലഞ്ചേരി. നിക്ഷിപ്ത താത്പര്യക്കാരാണ് ഇത്തരം പ്രചാരണം നടത്തുന്നതെന്നും ചെന്നിത്തല പറഞ്ഞു. സ്ഥാനാര്ഥിനിര്ണയ വിഷയത്തിലേക്കു സഭയെ വലിച്ചിഴയ്ക്കുന്നതു ശരിയല്ലെന്നു ഡൊമിനിക് പ്രസന്റേഷനും മാധ്യമങ്ങളോടു പറഞ്ഞു. ഇത്തരം പ്രചാരണം നടത്തിയാല് അതു നെഗറ്റീവ് ഫലമുണ്ടാക്കാനാണ് സാധ്യത. രാഷ്ട്രീയ പ്രചാരണമാണ് തൃക്കാക്കരയില് നടത്തേണ്ടതെന്നും ഡൊമിനിക് പ്രസന്റേഷന് പറഞ്ഞു. സഭയ്ക്കു ബന്ധമില്ലെന്നു അതിന്റെ നേതൃത്വത്തിലുള്ളവര് തന്നെ പറഞ്ഞ സ്ഥിതിക്ക് അതു കണക്കിലെടുക്കുകയാണ് വേണ്ടത്. അല്ലാതെ അനാവശ്യ ആശയക്കുഴപ്പങ്ങളുണ്ടാക്കരുതെന്നും പ്രസന്റേഷന് കൂട്ടിച്ചേര്ത്തു.