കോഴിക്കോട് : കൊവിഡില് തളര്ന്ന നാടകമേഖലയെ സഹായിക്കാനായി ഏര്പ്പെടുത്തിയ നാടകപ്രദര്ശനത്തില് സംവിധായകന് സുവീരന്റെ നാടകത്തിന് വിലക്ക് ഏര്പ്പെടുത്തി കേരള സംഗീത നാടക അക്കാദമി. പ്രിവ്യൂ കണ്ടതിന് ശേഷം മാത്രമേ പ്രദര്ശനാനുമതി നല്കൂവെന്ന് കാണിച്ച് സംവിധായകന് സുവീരന് അക്കാദമി കത്തയച്ചു. സംഘപരിവാര് അജണ്ട ചിലര് അക്കാദമി വഴി നടപ്പാക്കുകയാണെന്ന് സുവീരന് ആരോപിക്കുന്നു.
സുവീരനടക്കം തെരഞ്ഞെടുത്ത 20 നാടകസംഘങ്ങള്ക്കാണ് കൊവിഡ് കാല സമാശ്വാസമായി രണ്ട് ലക്ഷം രൂപ നല്കി നാടകമവതരിപ്പിക്കാന് അക്കാദമി അവസരം നല്കിയിരുന്നത്. ആദ്യം നല്കിയ വിഷയം മാറ്റി സമീപകാലത്ത് തനിക്കും കുടുംബത്തിനുമെതിരെ നടന്ന സംഘപരിവാര് ആക്രമണം കൂടി ഉള്പ്പെടുത്തി പുതിയ നാടകമാണ് സുവീരന് ഒരുക്കിയത്. ഇതിന് അനുവാദം നല്കിയ അക്കാദമി പിന്നീട് അവസരം നിഷേധിച്ച് കത്ത് നല്കുകയായിരുന്നു. നാടകം അവതരിപ്പിക്കും മുമ്പ് എറണാകുളത്തെത്തി അക്കാദമിയുടെ നിരീക്ഷകന്മാര് മുമ്പാകെ അവതരിപ്പിക്കണമെന്ന നിര്ദ്ദേശം സുവീരന് തള്ളി.
