തിരുവനന്തപുരം: സംസ്ഥാനത്ത് ആശുപത്രികളില് എത്താതെ രോഗികള്ക്ക് വീട്ടില് തന്നെ സൗജന്യമായി ഡയാലിസിസ് ചെയ്യാന് കഴിയുന്ന പെരിറ്റോണിയല് ഡയാലിസിസ് പദ്ധതി എല്ലാ ജില്ലകളിലും ആരംഭിച്ചതായി ആരോഗ്യ വകുപ്പ് മന്ത്രി വീണാ ജോര്ജ്. ആദ്യ ഘട്ടമായി ജില്ലയിലെ ഒരു പ്രധാന ആശുപത്രിയിലാണ് ഈ പദ്ധതിയ്ക്കുള്ള സംവിധാനം ഏര്പ്പെടുത്തിയിട്ടുള്ളത്. രജിസ്റ്റര് ചെയ്ത രോഗികള്ക്ക് പെരിറ്റോണിയല് ഡയാലിസിസിന് ആവശ്യമായ ഡയാലിസിസ് ഫ്ളൂയിഡ്, കത്തീറ്റര്, അനുബന്ധ സാമഗ്രികള് എന്നിവ ആശുപത്രികളില് നിന്നും സൗജന്യമായി ലഭ്യമാക്കുന്നു.
തിരുവനന്തപുരം ജനറല് ആശുപത്രി, കൊല്ലം ജില്ലാ ആശുപത്രി, പത്തനംതിട്ട ജനറല് ആശുപത്രി, ആലപ്പുഴ ജനറല് ആശുപത്രി, കോട്ടയം ജനറല് ആശുപത്രി, ഇടുക്കി തൊടുപുഴ ജില്ലാ ആശുപത്രി, എറണാകുളം ജനറല് ആശുപത്രി, തൃശൂര് ജനറല് ആശുപത്രി, പാലക്കാട് ജില്ലാ ആശുപത്രി, മലപ്പുറം തിരൂര് ജില്ലാ ആശുപത്രി, കോഴിക്കോട് ജനറല് ആശുപത്രി, വയനാട് മാനന്തവാടി ജില്ലാ ആശുപത്രി, കണ്ണൂര് ജില്ലാ ആശുപത്രി, കാസര്ഗോഡ് ജനറല് ആശുപത്രി എന്നീ ആശുപത്രികള് മുഖേനയാണ് വീട്ടില് സൗജന്യമായി ഡയാലിസ് ചെയ്യാന് കഴിയുന്ന പെരിറ്റോണിയല് ഡയാലിസിസ് സേവനം ലഭിക്കുന്നത്.
