പത്തനംതിട്ട : കാര് ആക്സസറീസ് സംരഭകര് നേരിടുന്ന പ്രശ്നങ്ങള് പരിഹരിക്കുവാനും ആശങ്കകള് അകറ്റുവാനും സര്ക്കാര് അടിയന്തര ഇടപെടല് നടത്തണമെന്ന് ദേശീയ അസംഘടിത തൊഴിലാളി കോണ്ഗ്രസ് സംസ്ഥാന സെക്രട്ടറി നഹാസ് പത്തനംതിട്ട ആവശ്യപ്പെട്ടു. നിരവധി യുവ സംരഭകരാണ് ഈ മേഖലയിലുള്ളത്. കോവിഡ് മൂലം വിപണികളില് ഉണ്ടായ പ്രതിസന്ധികളും വാഹനങ്ങള് മോഡിഫൈ ചെയ്യുന്നതിന്റെ പേരില് സര്ക്കാര് ഉദ്യോഗസ്ഥര് സ്വീകരിക്കുന്ന നിലപാടുകളും സംരഭകര്ക്ക് ഇരുട്ടടിയാണ് സമ്മാനിക്കുന്നത്. അതിനാല് ഈ മേഖലയില് ഉള്ളവരുമായി തുറന്ന ചര്ച്ചക്ക് സര്ക്കാര് തയ്യാറാകണം.
കാറുകളുടെ മോഡിഫിക്കേഷനായി ഉപയോഗിക്കുന്ന ബോഡിക്കിറ്റ്സ് ഉള്പ്പടെയുള്ളവ പ്രകൃതിക്ക് യാതൊരുവിധ പ്രശ്നവും സൃഷ്ടിക്കുന്നില്ല. ഇവയെല്ലാം സര്ക്കാരിന് കൃത്യമായ ടാക്സ് നല്കിയാണ് വിപണിയില് എത്തിക്കുന്നത്. വാഹനങ്ങളില് “ലീഗല് മോഡിഫിക്കേഷന് ” വരുത്താനുള്ള അനുവാദമാണ് സര്ക്കാര് നല്കേണ്ടത്. മറ്റ് സംസ്ഥാനങ്ങള് നിശ്ചിത തുക ഫീസ് ഈടാക്കി ലീഗല് മോഡിഫിക്കേഷന് അംഗീകരിക്കുന്നുണ്ട്. ഈ വിഷയം ഗൗരവമുള്ളതാണെന്നും സര്ക്കാരിന്റെ ശ്രദ്ധയില്പ്പെടുത്താന് ആവശ്യമായ നടപടികള് സ്വീകരിക്കുമെന്നും നഹാസ് പത്തനംതിട്ട പറഞ്ഞു.
