ചേളന്നൂര് : നിരവധി കേസുകളില് പ്രതിയായ ക്രിമിനല് വീടുകളില് നിര്ത്തിയിട്ട വാഹനങ്ങള് തീയിട്ട് നശിപ്പിച്ചു. മേലേടത്ത് സുരേഷ് എന്ന ക്രിമിനലാണ് പൊറോത്ത് താഴം, ഇച്ചന്നൂര് പ്രദേശത്ത് അഞ്ച് വീടുകളില് കയറി ആറ് വാഹനങ്ങള് കത്തിച്ചത്. ചൊവ്വ അര്ധരാത്രി മുതല് പുലരുംവരെ രണ്ട് കിലോമീറ്റര് ചുറ്റളവിലുള്ള വീടുകളിലാണ് അക്രമം. സിപിഐ എം ചേളന്നൂര് വെസ്റ്റ് ലോക്കല് സെക്രട്ടറി സി.പി ബിജുവിന്റെ വീട്ടില് നിര്ത്തിയിട്ട കാറും രണ്ട് ഇരുചക്രവാഹനവും കത്തിച്ചു.
കായലത്ത് മീത്തല് രൂപേഷിന്റെ ഓട്ടോറിക്ഷ, ഉണ്ണിപ്പുറത്ത് രാജീവന്റെ വീട്ടിലെ ഗുഡ്സ് ഓട്ടോറിക്ഷ, ചാലില് സലീമിന്റെ ഇരുചക്രവാഹനം തുടങ്ങിയവയാണ് തീയിട്ട് നശിപ്പിച്ചത്. വീടിനുപുറത്തുള്ള തുണിയും മറ്റ് സാധനങ്ങളും വാഹനത്തിന്റെ അടിയില് ഇട്ടാണ് തീയിട്ടത്. ജില്ലാ പോലീസ് മേധാവി ആര്.കറുപ്പസ്വാമിയുടെ നേതൃത്വത്തില് പോലീസും ഡോഗ് സ്ക്വാഡും അഗ്നിരക്ഷാസേനയും സ്ഥലത്തെത്തി. വീട്ടില്നിന്ന് കാക്കൂര് പോലീസ് അറസ്റ്റ് ചെയ്ത സുരേഷിനെ കോടതിയില് ഹാജരാക്കി റിമാന്ഡ് ചെയ്തു.
മോഷണവും മറ്റ് കുറ്റകൃത്യങ്ങളും പതിവാക്കിയ സുരേഷ് അടുത്ത ദിവസമാണ് ജയിലില്നിന്ന് പുറത്തിറങ്ങിയത്. മയക്കുമരുന്നിനും മദ്യത്തിനും അടിമയാണിയാള്. തിങ്കളാഴ്ച ചാലില് ആമിന മമ്മദ് കോയയുടെ വീട്ടില് കയറി സുരേഷ് പാത്രങ്ങളും സ്വര്ണാഭരണവും പണവും മോഷ്ടിച്ചിരുന്നു. എടവന് കാട്ടില് പുഷ്പരാജന്റെ വീട്ടിലെ കോഴിക്കൂട് കൊടുവാള്കൊണ്ട് വെട്ടിപ്പൊളിച്ച് കോഴികളെ പിടികൂടി. ഇതിനിടെ അവിടെ വച്ചുപോയ പുതപ്പ് പോലീസ് കസ്റ്റഡിയിലെടുത്തു. മുമ്പും അക്രമം നടത്തിയ സുരേഷിനെ പ്രദേശവാസികള് രാത്രി കാവലിരുന്ന് പിടികൂടി പോലീസിന് കൈമാറുകയായിരുന്നു.
