ന്യൂഡല്ഹി : രാഷ്ട്രപതി സ്ഥാനാര്ഥിയായി ബിജെപി ഉപരാഷ്ട്രപതിയായ വെങ്കയ്യ നായിഡുവിനെ പരിഗണിക്കുന്നതായി റിപ്പോര്ട്ടുകള്. ബിജെപി അധ്യക്ഷന് ജെ.പി നസ്സ, ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിങ് എന്നിവര് വെങ്കയ്യ നായിഡുവിന്റെ വസതിയിലെത്തി അദ്ദേഹവുമായി കൂടിക്കാഴ്ച നടത്തി. യശ്വന്ത് സിന്ഹയെ പ്രതിപക്ഷത്തിന്റെ രാഷ്ട്രപതി സ്ഥാനാര്ഥിയായി പ്രഖ്യാപിച്ചേക്കുമെന്ന റിപ്പോര്ട്ടുകള്ക്ക് പിന്നാലെയാണ് ബിജെപിയുടെ ഈ നീക്കം. രാഷ്ട്രപതിയാകുന്നതിന് സൂചനകള് നല്കി യശ്വന്ത് സിന്ഹ തൃണമൂല് കോണ്ഗ്രസില് നിന്ന് രാജിവെച്ചിരുന്നു. ഇന്ന് ചേരുന്ന പ്രതിപക്ഷ പാര്ട്ടികളുടെ യോഗത്തില് ഇക്കാര്യത്തിന് വ്യക്തതയുണ്ടാകും. ബിജെപി മുന് നേതാവ് കൂടിയായിരുന്നു യശ്വന്ത് സിന്ഹ.
രാഷ്ട്രപതി സ്ഥാനാര്ഥിയെ തീരുമാനിക്കുന്നതിനായി ബിജെപി പാര്ലമെന്ററി പാര്ട്ടി യോഗം ഇന്ന് വൈകീട്ട് ചേരുന്നുണ്ട്. സ്ഥാനാര്ഥിത്വം സംബന്ധിച്ച് പ്രതിപക്ഷ നേതാക്കളുമായി രാജ്നാഥ് സിങ് നേരത്തെ ചര്ച്ചകള് നടത്തിയിരുന്നു. എന്നാല് കൃത്യമായ ഒരു പേര് പ്രതിപക്ഷപാര്ട്ടികള് പറഞ്ഞിരുന്നില്ല. ളരദ് പവാര്, ഫാറൂഖ് അബ്ദുളള, ഗോപാല്കൃഷ്ണ ഗാന്ധി തുടങ്ങിയവരുടെ പേരുകള് പറഞ്ഞിരുന്നുവെങ്കിലും ഇവര് മൂവരും സ്വയം പിന്മാറുകയായിരുന്നു.
