തിരുവനന്തപുരം : ടൂറിസം സഹകരണത്തിന്റെ ഭാഗമായി വിയറ്റ്നാമില് നിന്ന് കേരളത്തിലേക്ക് വിമാന സര്വീസ് ആരംഭിക്കുന്ന കാര്യം സർക്കാർ പരിഗണനയിൽ. വിഷയം ഗൗരവമായി പരിഗണിക്കാൻ വിയറ്റ്നാമിലെ ബെന്ട്രി പ്രവിശ്യാ ചെയര്മാന് ട്രാന് നഗോക് ടാമും സംഘവും മുഖ്യമന്ത്രി പിണറായി വിജയനുമായി നടത്തിയ കൂടിക്കാഴ്ചയില് തീരുമാനമായി. വിയറ്റ് ജെറ്റ് എയർലൈൻസ് അധികൃതമായി ചർച്ച നടത്തിയ കാര്യം അറിയിച്ച മുഖ്യമന്ത്രിയാണ് ഇക്കാര്യം വ്യക്തമാക്കിയത്.
കാര്ഷിക മേഖലയിലെ യന്ത്രവല്ക്കരണം, മത്സ്യബന്ധന മേഖലയിലെ ആധുനിക വല്ക്കരണം, ടൂറിസം എന്നിവയില് കേരളത്തോട് സഹകരിക്കാന് അവര് താല്പ്പര്യപ്പെട്ടെന്നും ഐടി, ഉള്പ്പെടെയുള്ള മേഖലകളില് കേരളത്തിന്റെ സേവനം വിയറ്റ്നാമിന് ലഭ്യമാക്കുമെന്നും മുഖ്യമന്ത്രി അറിയിച്ചു. യോഗത്തില് സംസ്ഥാന കായിക വകുപ്പ് മന്ത്രി വി അബ്ദുറഹ്മാന്, ചീഫ് സെക്രട്ടറി ഡോ. വിപി ജോയി, സംസ്ഥാന സര്ക്കാരിന്റെ ദില്ലിയിലെ ഓഫീസര് ഓണ് സ്പെഷ്യല് ഡ്യൂട്ടി വേണു രാജാമണി തുടങ്ങിയവര് പങ്കെടുത്തു.
