ന്യൂഡൽഹി : ഇന്ത്യൻ കരസേനയുടെ സമഗ്ര ആധുനികവൽക്കരണത്തിനാണ് ഇനി പ്രഥമ പരിഗണന നൽകുകയെന്ന് കരസേന മേധാവി ജനറൽ ധീരജ് സേത്ത്. അതിന്റെ ഭാഗമായി ‘വിജയ് (VIJAY) കർമ്മ’ പദ്ധതി പ്രഖ്യാപിച്ചതായും അദ്ദേഹം അറിയിച്ചു. ഭാവിയിലെ യുദ്ധസാഹചര്യങ്ങളെയും സാങ്കേതിക വെല്ലുവിളികളെയും നേരിടാൻ സേനയെ കൂടുതൽ സജ്ജമാക്കുക എന്നതാണ് പദ്ധതിയുടെ പ്രധാന ലക്ഷ്യമെന്ന് അദ്ദേഹം പറഞ്ഞു. പുതിയ യുദ്ധമുഖങ്ങൾ, അത്യാധുനിക സാങ്കേതികവിദ്യ, ഡ്രോൺ അധിഷ്ഠിത ആക്രമണങ്ങൾ, സൈബർ ഭീഷണികൾ എന്നിവയെ നേരിടാൻ കരസേനയുടെ പ്രവർത്തനരീതിയിലും പരിശീലന സംവിധാനങ്ങളിലും മാറ്റങ്ങൾ കൊണ്ടുവരുമെന്ന് ജനറൽ ധീരജ് സേത്ത് വ്യക്തമാക്കി.
ഇന്ത്യൻ കരസേനയുടെ 31-ാമത് മേധാവിയായി ചുമതലയേറ്റതിന് പിന്നാലെയാണ് അദ്ദേഹം സേനയുടെ ഭാവി പ്രവർത്തനരേഖ വിശദീകരിച്ചത്. രാജ്യസുരക്ഷ കൂടുതൽ ശക്തിപ്പെടുത്തുന്നതിനൊപ്പം ആധുനിക യുദ്ധതന്ത്രങ്ങൾക്കനുസരിച്ച് സേനയെ പുനഃസംഘടിപ്പിക്കുന്നതിനാണ് ‘വിജയ് (VIJAY) കർമ്മ’ പദ്ധതിയിലൂടെ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.
