തിരുവനന്തപുരം : വിഴിഞ്ഞം വില്ലേജ് ഓഫീസില് ലക്ഷങ്ങളുടെ തിരിമറി നടത്തിയ കേസില് വില്ലേജ് ഫീല്ഡ് അസിസ്റ്റന്റ് അറസ്റ്റില്. കേസിനെ തുടര്ന്ന് ഒളിവിലായിരുന്ന ബി.കെ രതീഷിനെയാണ് പിടികൂടിയത്. കെട്ടിട നികുതി ഇനത്തില് കിട്ടിയ 6,30,000 രൂപയാണ് ഇയാള് തട്ടിയെടുത്തത്. തഹസില്ദാര് നടത്തിയ പരിശോധനയില് ക്യാന്സല് ചെയ്ത രസീതുകള് കണ്ടെത്തിയിരുന്നു. തുടര്ന്ന് നടത്തിയ അന്വേഷണമാണ് പ്രതിയിലേക്കെത്തിയത്.
ഒറ്റത്തവണ കെട്ടിട നികുതി അടയ്ക്കാന് വരുന്ന ഉപഭോക്താക്കളില് നിന്ന് പണം വാങ്ങി രസീത് നല്കുകയും അതിന് ശേഷം ഓണ്ലൈനായി രസീത് ക്യാന്സല് ചെയ്ത് തട്ടിപ്പ് നടത്തുന്നതായിരുന്നു ഇയാളുടെ രീതി. ഊരൂട്ടമ്പലം പോപ്പുലര് ജംഗ്ഷനിലെ വീട്ടില് നിന്നാണ് രതീഷിനെ പിടികൂടിയത്. ക്രമക്കേട് ബോധ്യപ്പെട്ടതിനെ തുടര്ന്ന് രതീഷിനെ നേരത്തെ സസ്പെന്ഡ് ചെയ്തിരുന്നു. 57 പേരുടെ നികുതിയാണ് ഇയാള് സ്വന്തം അക്കൗണ്ടിലേക്ക് മാറ്റിയത്. രതീഷ് നല്കിയ മുന്കൂര് ജാമ്യാപേക്ഷ സെഷന്സ് കോടതി നേരത്തെ തള്ളിയിരുന്നു.
