അമ്പലപ്പുഴ : ഓഫീസര്മാരില്ല കുട്ടനാട്ടില് വില്ലേജ് ഓഫീസുകള് നാഥനില്ലാ കളരി. പലയിടത്തും പകരം ചുമതല നല്കിയെന്നാണ് താലൂക്ക് അധികൃതര് പറയുന്നത്. എന്നാല്, പ്രവര്ത്തനങ്ങള് മുടങ്ങുന്നതായി പരാതിയുണ്ട്. വില്ലേജ് ഓഫിസുകളില് വിവിധ ആവശ്യങ്ങള്ക്കായി വരുന്നവര് കാത്തുനിന്ന് മടങ്ങേണ്ട അവസ്ഥയിലാണ്. തകഴി, മുട്ടാര്, വെളിയനാട്, തലവടി, എടത്വ, രാമങ്കരി, നെടുമുടി, കൈനകരി വടക്ക് എന്നിവിടങ്ങളിലാണ് ഓഫിസര്മാരില്ലാത്തത്.
മേഖലയില്, വേനല്മഴയിലും കാറ്റിലും വീടുകളുടെ മുകളില് മരങ്ങള് വീണും മറ്റും നഷ്ടം സംഭവിച്ചവര് വില്ലേജ് ഓഫിസുകള് കയറിയിറങ്ങുകയാണ്. നീറ്റ്, കീം ഉള്പ്പെടെ പ്രവേശന പരീക്ഷകള്ക്ക് സര്ട്ടിഫിക്കറ്റ് നല്കേണ്ട സമയവുമാണ്. നോണ് ക്രീമിലെയര്, പട്ടികജാതി സര്ട്ടിഫിക്കറ്റുകള് എന്നിവക്കായി ഏറെപ്പേര് അക്ഷയ കേന്ദ്രങ്ങളില് അപേക്ഷ നല്കി കാത്തിരിക്കുന്നു. പുതിയ സാമ്പത്തിക വര്ഷം ആരംഭിച്ചതോടെ കരം അടച്ച രസീത് പലര്ക്കും വേണം. ഭൂമി സംബന്ധമായ ഇടപാടുകളിലും ഭൂമി തരംമാറ്റല് പോലെ കാര്യങ്ങളിലും തീര്പ്പുണ്ടാക്കാന് കഴിയുന്നില്ല. അര്ബുദബാധിതര്ക്കുള്ള ആനുകൂല്യങ്ങളും മുടങ്ങി.
ഓഫിസ് പ്രവര്ത്തനങ്ങള് പലതും സോഫ്റ്റ്വെയര് അധിഷ്ഠിതമായതിനാല് പാസ്വേഡ്, വിരലടയാളം എന്നിവ വില്ലേജ് ഓഫിസര് നല്കിയാലേ കമ്പ്യൂട്ടര് ലോഗിന് ചെയ്യാന് കഴിയൂ. സമീപത്തെ വില്ലേജ് ഓഫിസര്മാര്ക്ക് ചുമതല നല്കിയാലും രണ്ടിടത്ത് ഒരുപോലെ ലോഗിന് ചെയ്യാന് കഴിയില്ല. മാസങ്ങളായി പല വില്ലേജുകളിലും ഓഫിസര്മാര് ഇല്ലാതായിട്ട്. പ്രകൃതിക്ഷോഭം മൂലം തുടര്ച്ചയായി ദുരിതം അനുഭവിക്കുന്ന കുട്ടനാട്ടുകാര്ക്ക് പ്രധാന ആശ്രയമാണ് വില്ലേജ് ഓഫിസുകള്.
