തിരുവനന്തപുരം : കെ.എസ്.ഇ.ബിയിലെ പ്രശ്നം പരിഹരിക്കുമെന്ന് വൈദ്യുതി മന്ത്രി കെ.കൃഷ്ണന് കുട്ടി. പ്രശ്നപരിഹാരത്തിന് ചെയര്മാന് തന്നെ മുന്കൈ എടുക്കുമെന്നും മന്ത്രി വ്യക്തമാക്കി. സമരം അവസാനിപ്പിക്കുന്നതിന്റെ ഭാഗമായി ചെയര്മാന് ബി.അശോകുമായി ചര്ച്ച നടത്തിയ ശേഷമാണ് വൈദ്യുതി മന്ത്രിയുടെ പ്രതികരണം. സമരക്കാരുമായി നേരിട്ട ചര്ച്ച നടത്തേണ്ടതില്ലെന്നും ബോര്ഡ് തല ചര്ച്ച നടത്തിയാല് മതിയെന്നും മന്ത്രി വ്യക്തമാക്കി. ചര്ച്ചയില് പരിഹാരമുണ്ടാകുമെന്നാണ് പ്രതീക്ഷ. കെ.എസ്.ഇ.ബി ചെയര്മാനുമായി നടന്ന കൂടിക്കാഴ്ച സ്വാഭാവികമായി നടക്കുന്നതെന്നും മന്ത്രി.കെ.എസ്,ഇ.ബിയില് നേരത്തേയും സമരങ്ങളുണ്ടായിട്ടുണ്ട്. അതും സ്വാഭാവികമാണ്. ചെയര്മാനെ മാറ്റണമെന്ന് ആവശ്യപ്പെടാന് യൂണിറ്റിന് അധികാരമില്ല. മന്ത്രി പറഞ്ഞു.
ഓഫിസേഴ്സ് അസോസിയേഷന്റെ ആഭിമുഖ്യത്തില് വൈദ്യുതി ഭവന് മുന്നില് അനിശ്ചിതകാല സത്യഗ്രഹവും നിസ്സഹരണ സമരവും തുടരുന്ന സാഹചര്യത്തിലാണ് കൂടിക്കാഴ്ച. സംഘടന ഭാരവാഹികളുടെ സസ്പെന്ഷന് പിന്വലിക്കുക, ചെയര്മാന്റെ ഏകാധിപത്യ നടപടികള് അവസാനിപ്പിക്കുക തുടങ്ങിയ ആവശ്യങ്ങള് ഉന്നയിച്ചാണ് സത്യഗ്രഹ സമരം നടക്കുന്നത്. ചെയര്മാനെ മാറ്റണമെന്ന ആവശ്യം ആരും ഉന്നയിച്ചിട്ടില്ലെന്ന് വൈദ്യുതി മന്ത്രി ഇതിനകം വ്യക്തമാക്കിയിട്ടുണ്ട്. ഇന്ന് നടത്തുന്ന ചര്ച്ചയില് സമരം അവാസനിപ്പിക്കുന്നതിനുള്ള ധാരണ ഉണ്ടായേക്കുമെന്നാണ് സൂചന. ചെയര്മാന്റെ സമീപനം തിരുത്തിയില്ലെങ്കില് ചട്ടപ്പടി സമരത്തിലേക്ക് നീങ്ങേണ്ടി വരുമെന്ന മുന്നറിയിപ്പും ഓഫിസേഴ്സ് അസോസിയേഷന് നല്കിയിട്ടുണ്ട്.
