കവിയൂർ : കോട്ടൂരിൽ വീടുകയറി നടത്തിയ അക്രമത്തിൽ ഗൃഹനാഥന് വെട്ടേറ്റു. നാഴിപ്പാറ മലയിൽപ്പടി ആനപ്പാറയ്ക്കൽ വീട്ടിൽ രാജ് മോഹനാണ്(48) വെട്ടേറ്റത്. കൈക്കും കാലിനും നെറ്റിക്കും മുറിവേറ്റ ഇദ്ദേഹം തിരുവല്ല താലൂക്ക് ആശുപത്രിയിൽ ചികിത്സയിലാണ്. രാജ് മോഹന്റെ വീട്ടുമുറ്റത്തുകിടന്ന ഓട്ടോറിക്ഷയും അടിച്ചുതകർത്തു.
വ്യാഴാഴ്ച രാവിലെ 10.30-നാണ് സംഭവം. രാജ്മോഹന്റെ ബന്ധുക്കളായ അനീഷ്, സുനീഷ്, രാജീവ് എന്നിവരുടെ നേതൃത്വത്തിലുള്ള സംഘമാണ് ആക്രമണം നടത്തിയതെന്ന് പോലീസ് പറഞ്ഞു. ഇവരുടെ ബന്ധുവിന്റെ ആനപ്പാറയ്ക്കലെ വീട്ടിൽ ബുധനാഴ്ച രാത്രി വിവാഹാഘോഷവും തുടർന്ന് സംഘർഷവും നടന്നു. ഇതിന്റെ തുടർച്ചയാണ് വീടുകയറിയുള്ള ആക്രമണം. തിരുവല്ല പോലീസ് കേസെടുത്തു.
