തിരുവല്ല : പ്രതിപക്ഷ നേതാവ് വിഡി സതീശന് നയിക്കുന്ന പുതുയുഗ യാത്രയുടെ തിരുവല്ലയിലെ വേദിയും ബോർഡുകളും കൊടി തോരണങ്ങളും നശിപ്പിച്ച ഇടതുപക്ഷത്തിന്റെ കിരാത നടപടിയില് യു.ഡി.എഫ്. പത്തനംതിട്ട ജില്ലാ ചെയര്മാന് അഡ്വ.വർഗ്ഗീസ് മാമ്മൻ ശക്തമായി പ്രതിഷേധിച്ചു. ഇന്ന് വൈകുന്നേരം ഡി.വൈ.എഫ്.ഐ, എസ്.എഫ്.ഐ ഗുണ്ടകളുടെ അഴിഞ്ഞാട്ടമാണ് തിരുവല്ലയില് നടന്നതെന്നും പോലീസ് നോക്കിനില്ക്കുകയായിരുന്നുവെന്നും വർഗ്ഗീസ് മാമ്മൻ കുറ്റപ്പെടുത്തി.
കേരളത്തിലുടനീളം പുതുയുഗ യാത്രയ്ക്ക് ലഭിക്കുന്ന വമ്പിച്ച സ്വീകരണവും ജനപങ്കാളിത്തവും കണ്ട് വിളറിപൂണ്ട സി.പി.എം നേതൃത്വത്തിന്റെ ഒത്താശയോടെയാണ് തിരുവല്ലയില് അക്രമം അരങ്ങേറിയത്. നിയമം കൈയ്യിലെടുത്ത് ഗുണ്ടാവിളയാട്ടം നടത്തിയവർക്കെതിരെ ശക്തമായ നടപടികള് സ്വീകരിക്കണം. പാർലമെന്റ് തെരഞ്ഞെടുപ്പിലും ത്രിതല പഞ്ചായത്ത് തെരഞ്ഞെടുപ്പിലും തിരുവല്ലയിൽ ഉണ്ടായ വൻ മുന്നേറ്റം നിയമസഭാ തെരഞ്ഞെടുപ്പിലും ആവർത്തിക്കുമെന്ന് കണ്ട എല്.ഡി.എഫിന്റെ പരാജയ ഭീതിയാണ് ഈ ആക്രമണത്തിന് പിന്നിലെന്നും അഡ്വ.വർഗ്ഗീസ് മാമ്മൻ പറഞ്ഞു.
