വൈപ്പിന് : അണലിയുടെ കടിയേറ്റ് ചികിത്സയിലായിരുന്ന ആള്ക്ക് 70,000 രൂപ നഷ്ടപരിഹാരം നല്കാന് ജില്ലാ ലീഗല് സര്വീസസ് അതോറിറ്റി അദാലത്തില് ധാരണ. നായരമ്പലം മേടക്കല് അതുലിനാണ് ഇത്തരത്തില് നഷ്ടപരിഹാരം ലഭിക്കുക. 2019ല് വീട്ടുമുറ്റത്ത് വച്ചാണ് അതുലിന് അണലിയുടെ കടിയേറ്റത്. തുടര്ന്ന് 15 ദിവസത്തോളം എറണാകുളത്തെ സ്വകാര്യ ആശുപത്രിയില് ചികിത്സയിലായിരുന്നു.
ജില്ലാ ലീഗല് അതോറിറ്റി സര്വീസസ് അതോറിറ്റി മുന്പാകെ മലയാറ്റൂര് ഡിവിഷന് ഫോറസ്റ്റ് ഉദ്യോഗസ്ഥരെ കക്ഷി ചേര്ത്തു കൊണ്ടാണ് ഹര്ജി സമര്പ്പിച്ചത്. അതോറിറ്റി സെക്രട്ടറിയും സബ് ജഡ്ജിയുമായ എന്.രഞ്ജിത്ത് കൃഷ്ണന്, അഭിഭാഷകനായ ലൈജോ പി.ജോസഫ് എന്നിവര് ഉള്പ്പെട്ട ബെഞ്ച് മുന്പാകെയാണ് നഷ്ടപരിഹാരം നല്കാന് ധാരണയായത്.
