തിരുവനന്തപുരം; സംസ്ഥാനത്ത് വിഷു ബംപര്‍ വില്‍പ്പന കൂടി. തിങ്കളാഴ്ച മാത്രം വിറ്റത് മൂന്നരലക്ഷം ഭാഗ്യക്കുറികളാണ്. ഞായറാഴ്ചയാണ് ബംപര്‍ പുറത്തിറക്കിയത്. കഴിഞ്ഞ ദിവസങ്ങളില്‍ വലിയ വര്‍ദ്ധനവാണ് ഭാഗ്യക്കുറി വില്‍പ്പനയില്‍ രേഖപ്പെടുത്തിയിരിക്കുന്നത്. വിഷു ബംപറിന്റെ ഒന്നാം സമ്മാനമായി നല്‍കുന്നത് 12 കോടി രൂപയാണ്. ആറു സീരീസിലിറക്കുന്ന ടിക്കറ്റിനു 300 രൂപയാണു വില. രണ്ടുമുതല്‍ അഞ്ചുവരെയുള്ള സമ്മാനങ്ങള്‍ എല്ലാ സീരീസിലും ലഭ്യമാകുമെന്ന സവിശേഷതയുഇ ഇത്തവണത്തെ വിഷു ബംപറിനുണ്ട്. മേയ് 24-നാണു നറുക്കെടുപ്പ്.
വലിയ മാറ്റങ്ങളോടെയാണ് വിഷു ബംപര്‍ വില്‍പ്പനയ്ക്ക് എത്തിയിരിക്കുന്നത്. വില്‍പ്പന നടത്തുന്ന ഏജന്റുമാര്‍ക്ക് നല്‍കുന്ന കമ്മീഷനില്‍ത്തന്നെ മാറ്റങ്ങള്‍ ആരംഭിക്കുന്നുണ്ട്. വിഷു ബംപര്‍ ഭാഗ്യക്കുറി വില്‍ക്കുന്ന ഏജന്റുമാര്‍ക്ക് ഓരോ ടിക്കറ്റിനും ഒരു രൂപവീതം അധികം നല്‍കാനാണ് ഭാഗ്യക്കുറി വകുപ്പ് തീരുമാനം എടുത്തിരിക്കുന്നത്. ഇപ്പോള്‍ കമ്മിഷനു പുറമേയാണ് ഒരു രൂപ അധിക കമ്മീഷന്‍ നല്‍കുന്നത്. 54 ലക്ഷം ടിക്കറ്റ് അച്ചടിക്കാനാണ് അനുമതി. 24 ലക്ഷം ടിക്കറ്റ് അച്ചടിച്ചു. ആകെ 49,46,12,000 രൂപയുടെ സമ്മാനങ്ങളുണ്ട്.
