തിരുവനന്തപുരം: ലോകമെമ്പാടുമുള്ള എല്ലാ മലയാളികള്ക്കും വിഷു ആശംസകള് നേര്ന്ന് മുഖ്യമന്ത്രി പിണറായി വിജയന്. സമ്പന്നമായ നമ്മുടെ കാര്ഷിക സംസ്കാരത്തിന്റെ ഓര്മപ്പെടുത്തലാണ് വിഷു. ഐശ്വര്യപൂര്ണമായ നല്ലൊരു നാളയെ വരവേല്ക്കുന്നതിനുള്ള വിഷു ആഘോഷങ്ങളില് മലയാളികള് ഒത്തൊരുമയോടെ പങ്കെടുക്കുകയാണ്. ഇല്ലാതായിക്കൊണ്ടിരിക്കുന്ന കാര്ഷിക സംസ്കാരത്തെ തിരിച്ചുപിടിക്കേണ്ടതുണ്ട്. ഈ വര്ഷത്തെ വിഷുവിന്റെ സന്ദേശം അതിനുള്ള ശക്തി പകരട്ടെ എന്നും മുഖ്യമന്ത്രി പറഞ്ഞു.
ഒത്തൊരുമയുടെ സന്ദേശം വിളിച്ചോതുന്നതാണ് ഏതൊരാഘോഷവും. വര്ഗീയതയും വിഭാഗീയതയും പറഞ്ഞ് നമ്മെ ഭിന്നിപ്പിക്കാന് ശ്രമിക്കുന്ന പ്രതിലോമശക്തികളെ കരുതിയിരിക്കേണ്ടതുണ്ട്. ഉന്നതമായ മനുഷ്യസ്നേഹത്തിലൂന്നിയ ഐക്യം കൊണ്ട് ഈ ശക്തികള്ക്ക് മറുപടി നല്കാന് നമുക്ക് സാധിക്കണം. സമത്വവും സാഹോദര്യവും പുലരുന്ന നല്ലകാലത്തെ വരവേല്ക്കാന് നമുക്കൊരുമിച്ചു നില്ക്കാം എന്നും മുഖ്യമന്ത്രി ആശംസാ സന്ദേശത്തില് കുറിച്ചു.
