തിരുവനന്തപുരം : കേരളത്തിന്റെ അടുത്ത ചീഫ് സെക്രട്ടറിയായി ആഭ്യന്തര അഡീഷണല് ചീഫ് സെക്രട്ടറി ഡോ. വിശ്വാസ് മേത്തയെ തെരഞ്ഞെടുത്തു. മന്ത്രിസഭാ യോഗത്തിന്റേതാണ് തീരുമാനം. നിലവിലെ ചീഫ് സെക്രട്ടറി ടോം ജോസ് ഈ മാസം 31 ന് വിരമിക്കുന്ന പശ്ചാത്തലത്തിലാണ് സര്ക്കാര് പുതിയ ചീഫ് സെക്രട്ടറിയെ തെരഞ്ഞെടുത്തത്. 1986 ബാച്ച് ഐഎഎസുകാരനാണ് ഡോ.വിശ്വാസ് മേത്ത. അദ്ദേഹത്തിന് അടുത്ത വര്ഷം ഫെബ്രുവരി വരെ സര്വീസുണ്ട്.
ആഭ്യന്തര അഡീഷണല് ചീഫ് സെക്രട്ടറി എന്ന നിലയില് മുഖ്യമന്ത്രി പിണറായി വിജയനുമായി അടുത്ത ബന്ധമുള്ളതും ഡോ. വിശ്വാസ് മേത്തയ്ക്ക് അനുകൂല ഘടകമായി. രാജസ്ഥാനിലെ ദുംഗാപൂര് സ്വദേശിയാണ്. വിശ്വാസ് മേത്തയേക്കാള് സീനിയറായ മൂന്ന് ഐഎഎസ് ഉദ്യോഗസ്ഥര് കേരള കേഡറില് ഉണ്ടെങ്കിലും അവര് കേന്ദ്രത്തില് സെക്രട്ടറിമാരാണ്. അവര് സംസ്ഥാന സര്വ്വീസിലേക്ക് മടങ്ങിവരാനുള്ള സാധ്യത കുറവാണ്. 1984 ബാച്ച് ഐഎഎസ് ഓഫീസറായ ടോം ജോസ് 2018 ജൂലൈയിലാണ് സംസ്ഥാനത്തിന്റെ 45-ാമത് ചീഫ് സെക്രട്ടറിയായി ചുമതലയേറ്റത്. വിരമിക്കുന്ന ചീഫ് സെക്രട്ടറി ടോം ജോസിനെ കൊവിഡ് പ്രതിരോധ പ്രവര്ത്തനങ്ങളുടെ ഏകോപന ചുമതലയുള്ള ഓഫീസറായി സര്ക്കാര് നിയോഗിച്ചേക്കുമെന്നാണ് സൂചന.
