തിരുവനന്തപുരം: സംസ്ഥാന ഭരണപരിഷ്ക്കരണ കമ്മീഷന് അധ്യക്ഷ സ്ഥാനത്തു നിന്നും വി എസ് അച്യുതാനന്ദന് രാജിവെച്ചു. നാലര വര്ഷമായി കാബിനെറ്റ് പദവിയില് കഴിഞ്ഞ ശേഷമാണ് അദ്ദേഹം സ്ഥാനമൊഴിഞ്ഞത്. ഭരണപരിഷ്കാര കമ്മീഷന് അദ്ധ്യക്ഷന് എന്ന നിലയില് നാലര വര്ഷമായി പ്രവര്ത്തിക്കുകയും 13 പഠന റിപ്പോര്ട്ടുകള് സര്ക്കാരിന് സമര്പ്പിക്കുകയും ചെയ്തുകഴിഞ്ഞു. ഇന്നലെ മൂന്ന് റിപ്പോര്ട്ടുകള് കൂടി വി എസ് സമര്പ്പിച്ചിരുന്നു. ആരോഗ്യപരമായ പ്രശ്നങ്ങളെ തുടര്ന്നാണ് രാജിയെന്ന് വി എസ് അറിയിച്ചു.
ഭരണപക്ഷിക്കരണ കമ്മീഷന് ചെയര്മാനെന്ന നിലയില് റിപ്പോര്ട്ടുകള് തയ്യാറാക്കാന് സംസ്ഥാനത്തുടനീളം സഞ്ചരിക്കുകയും ജനങ്ങളുമായി സംവദിക്കുകയും ചെയ്തിരുന്നു. നിരവധി സെമിനാറുകളും യോഗങ്ങളും നടത്തി. ഇത്തരം യോഗങ്ങളിലൂടെ ക്രോഡീകരിച്ച അഭിപ്രായ നിര്ദ്ദേശങ്ങള് ശാസ്ത്രീയമായ പഠനങ്ങള്ക്ക് വിധേയമാക്കിയപ്പോഴാണ് റിപ്പോര്ട്ടുകള് രൂപപ്പെട്ടത്. രണ്ട് റിപ്പോര്ട്ടുകള്കൂടി തയ്യാറാക്കിയിട്ടുണ്ട്. അതിന്റെ പ്രിന്റിങ്ങ് ജോലികള് തീരുന്ന മുറയ്ക്ക് അതും സര്ക്കാരിന് സമര്പ്പിക്കാനാവുെന്ന് വിഎ അറിയിച്ചു.
എന്നാല്, ആരോഗ്യപരമായ കാരണങ്ങളാല് അദ്ധ്യക്ഷന് എന്ന നിലയില് എനിക്ക് തുടരാനാവാതെ വന്നിരിക്കുന്നു. തലച്ചോറിലുണ്ടായ രക്തപ്രവാഹത്തെത്തുടര്ന്ന് ഡോക്ടര്മാരുടെ കര്ശന നിബന്ധനകള്ക്ക് വിധേയമായി തുടരുന്നതിനാല്, യോഗങ്ങള് നടത്താനോ, ചര്ച്ചകള് സംഘടിപ്പിക്കാനോ കഴിയുന്നില്ല. ഈ സാഹചര്യത്തില്, 31-01-2021 തിയ്യതി വെച്ച് ഭരണപരിഷ്കാര കമ്മീഷന് അദ്ധ്യക്ഷ സ്ഥാനം രാജിവെക്കുന്നതായി ഞാന് സര്ക്കാരിനെ അറിയിച്ചതായി അദ്ദേഹം ഫേസ്ബുക്ക് പോസ്റ്റില് വ്യക്തമാക്കി.
നൂറു കണക്കിന് ആളുകളുടെ കൂട്ടായ യത്നത്തിന്റെ ഫലമായാണ് കമ്മീഷന്റെ പഠന റിപ്പോര്ട്ടുകളുണ്ടായത്. ഈ യജ്ഞത്തില് സഹകരിച്ച എല്ലാവരോടും അകൈതവമായ കൃതജ്ഞത അറിയിക്കുന്നു. സര്ക്കാരിന് സമര്പ്പിച്ചിട്ടുള്ള റിപ്പോര്ട്ടുകളില് കൈക്കൊള്ളുന്ന തുടര് നടപടികളാണ് കമ്മീഷന് ചെലവഴിച്ച തുകയുടെ മൂല്യം നിശ്ചയിക്കുക. അതുണ്ടാവും എന്നാണ് ഞാന് പ്രതീക്ഷിക്കുന്നതെന്നും വി എസ് വ്യക്തമാക്കി.
നേരത്തെ വി എസ് കവടിയാറിലെ ഔദ്യോഗിക വസതി ഒഴിഞ്ഞിരുന്നു. ബാര്ട്ടന് ഹില്ലിലെ മകന്റെ വീട്ടിലാണ് ഇപ്പോള് വിഎസിന്റെ താമസം. 2016 ജൂലൈയിലാണ് കാബിനറ്റ് പദവിയോടെ ഭരണ പരിഷ്കാര കമ്മിഷന് അധ്യക്ഷനായി വി എസ് ചുമതലയേറ്റത്. അഞ്ച് വര്ഷത്തെ കാലാവധി പൂര്ത്തിയാക്കുന്നതിന് മുമ്ബ് സ്ഥാനം ഒഴിയാന് തീരുമാനിക്കുകയായിരുന്നു. കോവിഡ് വ്യാപനത്തിന് മുന്പ് തന്നെ ആരോഗ്യപ്രശനങ്ങള് കാരണം വി എസ് പൊതുരംഗത്ത് നിന്ന് വിട്ടു നില്ക്കുകയാണ്. ഇത്തവണത്തെ തദ്ദേശ തെരഞ്ഞെടുപ്പില് വിഎസിന് വോട്ട് ചെയ്യാന് കഴിഞ്ഞിരുന്നില്ല. പുന്നപ്രയിലാണ് അച്യുതാനന്ദനും കുടുംബത്തിന് വോട്ട്. തിരുവനന്തപുരത്ത് താമസിക്കുന്ന വിഎസിന് അനാരോഗ്യം മൂലം യാത്ര ചെയ്യാന് കഴിയാതെ വന്നതോടെയാണ് വോട്ട് ചെയ്യാനാകാത്ത സാഹചര്യം വന്നത്.
