തിരുവനന്തപുരം: പൊതുവിദ്യാഭ്യാസ വകുപ്പിന് കീഴിലെ ഫയലുകള് വൈകിപ്പിച്ചാല് കര്ശന നടപടി സ്വീകരിക്കുമെന്ന് വിദ്യാഭ്യാസ മന്ത്രി വി.ശിവന്കുട്ടി പറഞ്ഞു. സമഗ്ര ശിക്ഷ കേരളം പദ്ധതിയില് പ്രവര്ത്തിക്കുന്ന സംസ്ഥാന -ജില്ലാ – ബിആര്സി തലത്തിലെ ഉദ്യോഗസ്ഥരുടെയും പൊതുവിദ്യാഭ്യാസ വകുപ്പിലെ ഡിഡിമാരുടെയും മറ്റ് ഉയര്ന്ന ഉദ്യോഗസ്ഥരുടെയും സംയുക്ത യോഗത്തിലാണ് മന്ത്രി ഇക്കാര്യം വ്യക്തമാക്കിയത്. ഫയല് പ്രവര്ത്തനങ്ങള് ത്വരിതഗതിയിലാക്കണമെന്ന് നിരന്തരം ആവശ്യപ്പെട്ടുകൊണ്ടിരിക്കുമ്പോഴും ചില ഉദ്യോഗസ്ഥര് സര്ക്കാരിന്റെ നിര്ദ്ദേശങ്ങളോട് മുഖം തിരിച്ചു നില്ക്കുന്ന സമീപനമാണ് ഇപ്പോഴും സ്വീകരിച്ചു വരുന്നതെന്ന് മന്ത്രി സൂചിപ്പിച്ചു.
ഈ നില തുടരാന് അനുവദിക്കില്ലെന്നും സമയബന്ധിതമായി പദ്ധതി പ്രവര്ത്തനങ്ങള് പൂര്ത്തിയാക്കുന്നതിന് ചുമതലപ്പെട്ടവര് ശ്രദ്ധ ചെലുത്തണമെന്നും മന്ത്രി പറഞ്ഞു. പൊതുവിദ്യാഭ്യാസ വകുപ്പിന് കീഴിലെ വിവിധ ഏജന്സികളുടെ ഏകോപനം ഉറപ്പു വരുത്തേണ്ടതുണ്ടെന്നും പദ്ധതികളുടെ ആസൂത്രണം മുതല് നടപ്പിലാക്കുന്നത് വരെയുള്ള ഘട്ടങ്ങളിലെ കൂട്ടായ്മ ഇനിയും വര്ദ്ധിപ്പിക്കേണ്ടതുണ്ടെന്നും മന്ത്രി നിര്ദേശിച്ചു.
