തിരുവനന്തപുരം: ഗാന്ധിജി തുലയട്ടെ എന്ന് നെഹ്റു ആഗ്രഹിച്ചുവെന്ന എംഎം മണി എംഎല്എയുടെ പരാമര്ശത്തെ വിമര്ശിച്ച് വിടി ബല്റാം. മണിയുടെ നിലവാരവും ചരിത്രബോധവും കണക്കിലെടുത്താല് ഇത്തരം കാര്യങ്ങള് പറയുന്നത് സ്വാഭാവികമാണെന്ന് ബല്റാം ഫേസ്ബുക്കില് കുറിച്ചു. കര്ഷക സംഘത്തിന്റെ വിതുര ഏരിയ സമ്മേളന ഉദ്ഘാടന വേദിയിലായിരുന്നു എം എം മണിയുടെ പരാമര്ശം.
ഗാന്ധിജിയെ കൊന്നത് ആര്.എസ്.എസ് ആണെങ്കിലും അദ്ദേഹം തുലയട്ടെയെന്ന് നെഹ്റു ഉള്പ്പെടെയുള്ള കോണ്ഗ്രസുകാര് വിചാരിച്ചു. ഈ ചിന്തയ്ക്ക് പിന്നിലെ കാരണം അധികാരത്തില് എത്തിയപ്പോള് ഗാന്ധിജി ഒരു അസൗകര്യമായി മാറി എന്നതാണ്. അല്ലെങ്കില് ഇന്റലിജന്സ് മുന്നറിയിപ്പ് അവഗണിച്ച് ഗാന്ധിജിയെ എങ്ങനെയാണ് വധിച്ചതെന്നായിരുന്നു മണിയുടെ പ്രസംഗം. ഡി കെ മുരളി എം എല് എ ഉള്പ്പെടെയുള്ളവര് വേദിയിലിരിക്കെയായിരുന്നു എം എം മണിയുടെ പരാമര്ശം.