പാലക്കാട്: വാളയാറില് സഹോദരിമാര് ബലാത്സംഗത്തിനിരയായി കൊല്ലപ്പെട്ട സംഭവത്തില് ഗുരുതര വെളിപ്പെടുത്തലുമായി പെണ്കുട്ടികളുടെ അച്ഛന്. പെണ്കുട്ടികള് കൊല്ലപ്പെട്ടതുമായി ബന്ധപ്പെട്ട കുറ്റം ഏറ്റെടുക്കാന് അന്വേഷണ ഉദ്യോഗസ്ഥനായ ഡിവൈ.എസ്.പി സോജന് നിര്ബന്ധിച്ചതായാണ് വെളിപ്പെടുത്തല്.
പലരും ഇതുപോലെ കുറ്റം ഏറ്റെടുക്കാറുണ്ടെന്നും കേസ് ഏറ്റെടുക്കുകയാണെങ്കില് തന്നെ രക്ഷപ്പെടുത്താമെന്നും സോജന് വാഗ്ദാനം ചെയ്തതായും അദ്ദേഹം വ്യക്തമാക്കി. പെണ്കുട്ടികളെ തൂങ്ങിമരിച്ച നിലയില് കണ്ട സ്ഥലത്ത് താനും ആത്മഹത്യയ്ക്ക് ശ്രമിച്ചിരുന്നതായും ഭാര്യയുടെ ശ്രദ്ധയില്പെട്ടതിനാല് രക്ഷപ്പെടുത്തുകയായിരുന്നുവെന്നും പെണ്കുട്ടികളുടെ അച്ഛന് പറഞ്ഞു.
കേസില് ഉന്നതനായ ഒരു പ്രതി കൂടി ഉള്പ്പെട്ടിട്ടുണ്ടെന്നും ഈ പ്രതിയെ രക്ഷപ്പെടുത്താനാണ് ഡിവൈ.എസ്.പി സോജന് ശ്രമിച്ചതെന്നും പെണ്കുട്ടികളുടെ അമ്മ ആരോപിച്ചു. കേസിലെ പ്രതികളെ വെറുതെ വിട്ടിട്ട് ഇന്നേക്ക് ഒരു വര്ഷം തികയുകയാണ്. തങ്ങള്ക്ക് നീതി ലഭ്യമാക്കണമെന്നാവശ്യപ്പെട്ട് പെണ്കുട്ടികളുടെ അമ്മ സത്യാഗ്രഹ സമരം തുടങ്ങിയിട്ടുണ്ട്. ഈ മാസം 31 വരെ സമരം തുടരും. വി.കെ. ശ്രീകണ്ഠന് എം.പി, സി.ആര്. നീലകണ്ഠന് തുടങ്ങി നിരവധി പേര് ഐക്യദാര്ഢ്യവുമായി സമര പന്തലിലെത്തിയിരുന്നു.
