കോന്നി : പയ്യനാമണ് താവളപ്പാറയില് കാര്മല് സ്കൂളിന് സമീപം സാമൂഹ്യ വിരുദ്ധര് നടുറോഡില് മാലിന്യം തള്ളിയതിനെ തുടര്ന്ന് പ്രദേശത്ത് രൂക്ഷമായ ദുര്ഗന്ധമെന്ന് നാട്ടുകാരുടെ പരാതി. കുപ്പിച്ചില്ലുകളും മത്സ്യ – മാംസാവശിഷ്ടങ്ങളും അടങ്ങിയ മാലിന്യ ചാക്കുകളാണ് റോഡില് വലിച്ചെറിഞ്ഞിരിക്കുന്നത്. കോന്നി, പയ്യനാമണ് പ്രദേശങ്ങളിലെ വീടുകളില് നിന്നും ഫ്ലാറ്റുകളില് നിന്നുമുള്ള മാലിന്യങ്ങളാണ് ഇവയെല്ലാം എന്നാണ് ജനങ്ങളുടെ സംശയം. രാത്രി സമയത്താണ് മാലിന്യം തള്ളിയത് എന്നാണ് നിഗമനം. ഇതിനാല് പ്രദേശത്തെ സി.സി.റ്റി.വി ദൃശ്യങ്ങള് പരിശോധിച്ച് മാലിന്യം തള്ളിയവരെ പിടികൂടണമെന്നാണ് നാട്ടുകാരുടെ ആവശ്യം.
കഴിഞ്ഞ കുറച്ച് ദിവസങ്ങള്ക്ക് മുന്പും ഇത്തരത്തില് മാലിന്യങ്ങള് റോഡില് തള്ളിയിരുന്നു. റോഡില് തള്ളുന്ന കുപ്പിച്ചില്ലുകള് കാല്നടയാത്രക്കാര്ക്കും വാഹനയാത്രക്കാര്ക്കും ഒരുപോലെ ഭീഷണിയാവുകയാണ്. സ്കൂള് കുട്ടികള് നടന്നുപോകുന്ന റോഡായതിനാല് ഇത് കുട്ടികള്ക്കും വലിയ ഭീഷണിയായി മാറുകയാണ്. രാത്രിയില് ഈ ഭാഗത്ത് അധികം ആളുകള് വരാത്തതും മാലിന്യം തള്ളുന്നവര്ക്ക് സൗകര്യമൊരുക്കുന്നു. റോഡില് വീണുകിടന്ന കുപ്പിച്ചില്ലുകള് സ്ഥലത്തെ ഗ്രാമപഞ്ചായത്തംഗത്തിന്റെ നേതൃത്വത്തില് നാട്ടുകാര് തന്നെ കഴിഞ്ഞ ദിവസം നീക്കംചെയ്തിരുന്നു. രാത്രി സമയങ്ങളില് പോലീസ് പെട്രോളിംഗ് ശക്തമാക്കണമെന്നും ആവശ്യമുയരുന്നു.
