ചിറ്റാര് : പൊട്ടിയ പൈപ്പ് അറ്റകുറ്റപ്പണികള് നടത്താതെ കമ്പും തുണിയും കുത്തിത്തിരുകി പരിഹരിച്ച് മാതൃകയായിരിക്കുകയാണ് ചിറ്റാറിലെ വാട്ടര് അതോറിറ്റി അധികൃതര്. ചിറ്റാര് – തെക്കേക്കര റോഡിലാണ് കഴിഞ്ഞ കുറച്ചു ദിവസങ്ങള്ക്ക് മുന്പ് വാട്ടര് അതോറിറ്റിയുടെ പൈപ്പ് ലൈന് പൊട്ടിയത്. പൈപ്പ് പൊട്ടി കുടിവെള്ളം നടുറോഡില് പാഴായതിനെ തുടര്ന്ന് നാട്ടുകാര് വാട്ടര് അതോറിറ്റി അധികൃതരെ വിവരം ധരിപ്പിച്ചു. ഇവര് പൊട്ടിയ ഭാഗം പഴയ തുണിയും കമ്പും കുത്തിക്കയറ്റി താത്കാലികമായി അടയ്ക്കുക മാത്രമാണ് ചെയ്തത്. നിരവധിപ്രാവശ്യം വിളിച്ച് ദിവസങ്ങളോളം കാത്തിരുന്നിട്ടാണ് ജീവനക്കാര് വന്നതും പഴന്തുണിയും കമ്പും കയറ്റിവെച്ചതും. അതുവരെ കുടിവെള്ളം പാഴാകുകയായിരുന്നു.
ചിറ്റാര് പഞ്ചായത്തിലെ വിവിധ പ്രദേശങ്ങളില് കുടിവെള്ള ക്ഷാമം രൂക്ഷമാണ്. ഉയര്ന്ന പ്രദേശങ്ങളില് വെള്ളം ലഭിക്കാതെ വന്നതോടെ നാട്ടുകാര് സ്വകാര്യ വ്യക്തികള്ക്ക് പണം നല്കിയാണ് കുടിവെള്ളം വീടുകളില് എത്തിക്കുന്നത്. മലയോര മേഖലയിലെ പല വീടുകളിലും കിണര് ഉണ്ടെങ്കിലും വേനല് മഴ ലഭിക്കാതെ വന്നതോടെ കിണറുകള് വറ്റി വരണ്ടിരുന്നു. സ്വകാര്യ വാഹനങ്ങളില് വെള്ളം എത്തിക്കണമെങ്കില് തന്നെ നാട്ടുകാര്ക്ക് വലിയ ഒരു തുക ചിലവാക്കേണ്ടി വരുന്നുണ്ട്. സാധാരണക്കാരായ ഇവിടുത്തെ ആളുകള്ക്ക് താങ്ങാവുന്നതിലും അപ്പുറമാണ് കുടിവെള്ളത്തിന് വേണ്ടി വരുന്ന ഈ ചിലവ്. ഇതിനിടെയാണ് കേരള വാട്ടര് അതോറിറ്റിയുടെ ഈ അനാസ്ഥ.
