മല്ലപ്പള്ളി: മണ്ണിനെയും മനുഷ്യരെയും മറന്നുള്ള സംസ്ക്കാരത്തിലേക്ക് പുതിയ തലമുറ വഴുതി മാറിയതാണ് ഇന്ന് സമൂഹം നേരിടുന്ന ഏറ്റവും വലിയ വെല്ലുവിളിയെന്ന് ചലച്ചിത്ര നടനും കൃഷി പ്രചാരകനുമായ അനൂപ് ചന്ദ്രൻ പറഞ്ഞു. കല്ലൂപ്പാറ അഗ്രികൾച്ചർ പ്രൊഡ്യൂസേഴ്സ് ആൻഡ് പ്രമോട്ടേഴ്സ് അസോസിയേഷന്റെ ആഭിമുഖ്യത്തിൽ രൂപീകരിക്കുന്ന നാടൻ പച്ചക്കറി വിത്തുബാങ്ക് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മണ്ണിലേക്ക് ഇറങ്ങുമ്പോൾ പ്രകൃതിയെ അറിയും, അതിലൂടെ മനസ് പാകപ്പെടും, പ്രതിസന്ധികൾ ധൈര്യപൂർവം തരണം ചെയ്യാനുള്ള കരുത്തും ആർജിക്കാനാകും. കൃഷിയെന്നാൽ കഷായമില്ലാത്ത അവസ്ഥയാണെന്നും അദ്ദേഹം പറഞ്ഞു.
ലോകത്തിലെ ഏറ്റവും വലിയ പച്ചമുളക് ചെടി വളർത്തി ഗിന്നസ് റെക്കോർഡ് നേടിയ കർഷകൻ ജെയിംസ് ഏബ്രഹാമിനെ ചടങ്ങിൽ ആദരിച്ചു. അസോസിയേഷന് പ്രസിഡന്റ് സി.കെ മത്തായി അധ്യക്ഷത വഹിച്ചു. സമ്മേളനം കല്ലൂപ്പാറ പഞ്ചായത്ത് പ്രസിഡന്റ് ജ്ഞാന മണി മോഹന് ഉദ്ഘാടനം ചെയ്തു. കൃഷി അറിവുകൾ പകരുന്നതിനായി ആരംഭിച്ച നവമാധ്യമ കൂട്ടായ്മയുടെ ഉദ്ഘാടനം മലയാള മനോരമ അസിസ്റ്റന്റ് എഡിറ്റർ വർഗീസ് സി.തോമസ് നിർവഹിച്ചു. സെക്രട്ടറി ലെജു ഏബ്രഹാം, ട്രഷറർ സതീഷ് ഏബ്രഹാം എന്നിവർ പ്രസംഗിച്ചു.
സങ്കരയിനം പച്ചക്കറികളുടെ വിത്തുകളും തൈകളും വ്യാപകമായതോടെ വംശമറ്റുകൊണ്ടിരിക്കുന്ന നാടൻ ഇനങ്ങളെ സംരക്ഷിക്കുകയും പ്രചരിപ്പിക്കുകയുമാണ് വിത്തു ബാങ്ക് രൂപീകരണത്തിലൂടെ ലക്ഷ്യമിടുന്നത്. നാടൻ പച്ചക്കറി വിത്തുകൾ ശേഖരിച്ച് അവ തെരഞ്ഞെടുത്ത കർഷകർക്ക് നൽകി കൃഷി രീതിയിലും വിത്തുൽപാദനത്തിലും പരിശീലനം നൽകുമെന്ന് ഭാരവാഹികള് പറഞ്ഞു.
