തിരുവനന്തപുരം : അടുത്ത അഞ്ച് ദിവസത്തേയ്ക്ക് തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി എന്നീ ജില്ലകളില് കാലാവസ്ഥ കേന്ദ്രം യെല്ലോ അലര്ട്ട് പ്രഖ്യാപിച്ചിട്ടുണ്ട്. സംസ്ഥാനത്ത് ഇന്ന് ഒറ്റപ്പെട്ട ഇടങ്ങളില് ശക്തമായ മഴയ്ക്കും കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ മുന്നറിപ്പ്. ഇന്ന് ഉച്ച മുതല് രാത്രി വരെ ഇടിമിന്നലിനും സാധ്യതയുണ്ടെന്ന് കാലാവസ്ഥ വകുപ്പ് അറിയിച്ചിട്ടുണ്ട്. മധ്യ പടിഞ്ഞാറന് ബംഗാള് ഉള്ക്കടലിലെ അതിതീവ്ര ന്യൂനമര്ദ്ദം ദുര്ബലമായി തീവ്ര ന്യൂനമര്ദ്ദമായി ഒഡീഷയിലെ പുരി തീരത്തിനടുത്ത് എത്തും.
ഇത് ബംഗാള് തീരത്തെത്തുമ്പോള് ശക്തി കുറഞ്ഞ ശേഷം വീണ്ടും ശക്തി പ്രാപിച്ചേക്കുമെന്നാണ് കാലാവസ്ഥ നിരീക്ഷണ കേന്ദ്രം കണക്കു കൂട്ടുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുമെന്നാണ് കാലാവസ്ഥ വകുപ്പ് അറിയിച്ചത്. ചില ജില്ലകളില് ഗ്രീന്, യെല്ലോ അലര്ട്ടാണ് നല്കിയിരിക്കുന്നതെങ്കിലും, കഴിഞ്ഞ ദിവസങ്ങളില് മലയോര മേഖലകളില് ഒറ്റപ്പെട്ട ശക്തമായ ഇടിയോട് കൂടിയ മഴയാണ് ലഭിച്ചത്. ഇതിനാല് മലയോര മേഖലകളില് ഓറഞ്ച് അലര്ട്ടിന് സമാനമായ ജാഗ്രത പാലിക്കണമെന്നാണ് കാലാവസ്ഥ വകുപ്പിന്റെ മുന്നറിയിപ്പ്.
