തിരുവനന്തപുരം : ബംഗാള് ഉള്ക്കടലിലെ ന്യൂനമര്ദ സാധ്യതയും ആന്ഡമാന് കടലില് ചക്രവാതചുഴി രൂപപ്പെടാന് സാധ്യതയും കണക്കിലെടുത്ത് കേരളത്തില് വരുന്ന അഞ്ച് ദിവസം ഇടിയോട് കൂടിയ മഴക്ക് സാധ്യതയുണ്ടെന്ന് കാലാവസ്ഥാ നിരീക്ഷണ വകുപ്പ്. തെക്കേഇന്ത്യയ്ക്കു മുകളിലെ ന്യൂനമര്ദ പാത്തി, കിഴക്ക്- പടിഞ്ഞാറന് കാറ്റുകളുടെ സംയോജനം എന്നിവയുടെ സ്വാധീനവും മഴക്ക് കാരണമാകും. ചൊവ്വാഴ്ച കേരളത്തില് ഒറ്റപ്പെട്ട ശക്തമായ മഴയ്ക്കു സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു.
ചൊവ്വാഴ്ച ബംഗാള് ഉള്ക്കടലില് ന്യൂനമര്ദ സാധ്യതയും തെക്കന് ആന്ഡമാന് കടലില് ചക്രവാതചുഴി രൂപപ്പെടാന് സാധ്യതയുമുണ്ട്. മേയ് ആറോടെ ഇത് ന്യൂനമര്ദമാകാനും തുടര്ന്നുള്ള ദിവസങ്ങളില് കൂടുതല് ശക്തി പ്രാപിക്കാനും സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു. കേരള-കര്ണാടക- ലക്ഷദ്വീപ് തീരങ്ങളില് മത്സ്യബന്ധനത്തിന് തടസ്സമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. 2022 ഏപ്രില് 4 മുതല് 5 വരെ മധ്യ – കിഴക്ക് ബംഗാള് ഉള്ക്കടല്, വടക്കന് ആന്ഡമാന് കടലിനോട് ചേര്ന്നുള്ള മേഖലകളിലും തെക്ക് ആന്ഡമാന് കടലിലും മണിക്കൂറില് 40-50 കിലോമീറ്റര് വേഗത്തിലും ചില അവസരങ്ങളില് 60 കിലോമീറ്റര് വേഗത്തിലും ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്.
2022 ഏപ്രില് 6 ന് ആന്ഡമാന് കടലിലും മധ്യ – കിഴക്ക്, തെക്ക് കിഴക്ക് ബംഗാള് ഉള്ക്കടലിനോട് ചേര്ന്നുള്ള മേഖലകളിലും മണിക്കൂറില് 40-50 കിലോമീറ്റര് വേഗത്തിലും ചില അവസരങ്ങളില് 60 കിലോമീറ്റര് വേഗത്തിലും ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്.