തിരുപ്പൂർ : ആസന്നമായ ലോക്സഭാ തിരഞ്ഞെടുപ്പ് രാജ്യത്തെ സംരക്ഷിക്കുന്ന മാറ്റത്തിനുള്ള തിരഞ്ഞെടുപ്പായിരിക്കണമെന്ന് എം.പി.യും ഡി.എം.കെ. ഡെപ്യൂട്ടി ജനറൽ സെക്രട്ടറിയുമായ കനിമൊഴി. ഡി.എം.കെ.യുടെ തിരഞ്ഞെടുപ്പ് പ്രകടനപത്രിക തയ്യാറാക്കുന്നതിന്റെ ഭാഗമായി സമൂഹത്തിന്റെ വിവിധ വിഭാഗങ്ങളിൽ നിന്നുള്ള അഭിപ്രായങ്ങൾ തേടാനായി തിരുപ്പൂരിൽ എത്തിയതായിരുന്നു കനിമൊഴി.
രാജ്യം എന്നെന്നും എല്ലാവർക്കും തുല്യമായിരിക്കണമെന്നത് നമ്മുടെ പൂർവികരുടെ സ്വപ്നമാണ്. വർഷങ്ങളായി, ബഹുസ്വരമായ ഭാഷകളും സാംസ്കാരിക വൈവിധ്യങ്ങളും ഉണ്ടായിരുന്നിട്ടും നമുക്ക് നാനാത്വത്തിൽ ഏകത്വം ഉണ്ടായിരുന്നെന്ന് അവർ ചൂണ്ടിക്കാട്ടി. എന്നാൽ, കേന്ദ്ര ഭരണത്തിലിരിക്കുന്നവർ ജനങ്ങൾക്കിടയിൽ മത, ജാതി ചിന്തകൾ കുത്തിക്കയറ്റി വെറുപ്പും വിദ്വേഷവും സൃഷ്ടിക്കുന്നത് വേദനാജനകമാണെന്ന് കനിമൊഴി വ്യക്തമാക്കി.
