ടെഹ്റാന് : ഹിജാബ്വിരുദ്ധ പ്രതിഷേധം കെട്ടടങ്ങാത്ത പശ്ചാത്തലത്തില് സോഷ്യല് മീഡിയ ആപ്പുകളായ ഇന്സ്റ്റഗ്രാമിനും വാട്സാപ്പിനും നിരോധനം ഏര്പ്പെടുത്തി ഇറേനിയന് സര്ക്കാര്. ബുധനാഴ്ച വൈകു നേരം മുതല് രണ്ട് ആപ്പുകളും ഇറാനില് ലഭ്യമല്ല. ഫേസ്ബുക്ക്, ട്വിറ്റര്, ടെലഗ്രാം, യൂടൂബ് മുതലായ സോഷ്യല് മീഡിയ സംവിധാനങ്ങള്ക്ക് നേരത്തേ മുതല് നിയന്ത്രണമുണ്ട്. ഇന്റര്നെറ്റ് ഉപയോഗവും നിയന്ത്രണവിധേയമാക്കിയിട്ടുണ്ട്. പുറംരാജ്യങ്ങളിലെ വെബ്സൈറ്റുകള് ലഭ്യമല്ലാതായി. ഇതിനിടെ ഇറാനിലെ പ്രതിഷേധങ്ങളില് കൊല്ലപ്പെട്ടവരുടെ എണ്ണം ഒമ്പതായി ഉയര്ന്നു.
ഹിജാബ് നിയമം ലംഘച്ചതിന്റെ പേരില് മോറല് പോലീസ് അറസ്റ്റ് ചെയ്ത മഹ്സ അമിനി മരിച്ചതിനു പിന്നാലെ പൊട്ടിപ്പുറപ്പെട്ട പ്രതിഷേധം ഇറേനിയന് സര്ക്കാരിനോടുള്ള പരസ്യവെല്ലുവിളിയായി മാറിയിരിക്കുകയാണ്. തലസ്ഥാനമായ ടെഹ്റാന് അടക്കം ഒട്ടുമിക്ക പ്രമുഖ നഗരങ്ങളിലും സ്ത്രീകളടക്കം വ്യാപകമായി തെരുവിലിറങ്ങി ശിരോവസ്ത്രം ഊരിയെറിഞ്ഞും കത്തിച്ചും പ്രതിഷേധം പ്രകടിപ്പിക്കുകയാണ്. വിദേശങ്ങളിലെ ഇറേനിയന് നയതന്ത്രകാര്യാലയങ്ങള്ക്കു മുന്നിലും പ്രകടനങ്ങള് അരങ്ങേറുന്നു.
