തിരുവല്ല : വഴിവക്കിലെ വസ്തു കാണിച്ച് വില പറഞ്ഞ് അഡ്വാന്സും വാങ്ങി മുങ്ങുന്ന വിരുതന് പോലീസിന്റെ പിടിയിലായി. ചങ്ങനാശ്ശേരി വാഴപ്പള്ളി കൊടുവക്കുളം വീട്ടില് സുനില് കുമാര് (47) ആണ് പിടിയിലായത്. പ്രധാന റോഡുകള്ക്ക് സമീപമുള്ള ലക്ഷങ്ങള് വിലമതിക്കുന്ന വസ്തു വകകള് പകുതി വിലയ്ക്ക് വാങ്ങി നല്കാമെന്ന് വിശ്വസിപ്പിച്ചാണ് പലരില് നിന്നായി ലക്ഷങ്ങള് തട്ടിയത്.
പണം വാങ്ങി മുങ്ങിയ ഇയാള് സിം കാര്ഡുകള് മാറി മാറി ഉപയോഗിച്ചു വന്നിരുന്നതനാല് പിടികൂടാന് പോലീസും പണിപ്പെട്ടു. തന്ത്ര പരമായ നീക്കത്തിലൂടെയാണ് പോലീസ് വ്യാഴാഴ്ച വൈകിട്ടോടെ ഇയാളെ വേങ്ങലില് നിന്നും വലയിലാക്കിയത്. ടികെ റോഡിലെ തോട്ടഭാഗത്ത് റോഡിനോട് ചേര്ന്നുള്ള വസ്തു വാങ്ങി നല്കാമെന്ന് വിശ്വസിപ്പിച്ച് തലവടി സ്വദേശി ഗീവര്ഗീസ്, പാലിയേക്കര സ്വദേശി ഉമ്മന് എന്നിവരില് നിന്നായി അഞ്ചു ലക്ഷം രൂപ വീതം തട്ടിയെടുത്തെന്ന പരാതിയില് നടത്തിയ അന്വേഷണത്തിലാണ് പ്രതി പിടിയിലായത്.
സമീപ ജില്ലകളിലെ വിവിധ പോലീസ് സ്റ്റേഷനുകളില് ഇയാള്ക്കെതിരെ സമാനമായ തട്ടിപ്പു കേസുകള് നിലവിലുണ്ടെന്ന് പോലീസിന്റെ അന്വേഷണത്തില് വ്യക്തമായിട്ടുണ്ട്. തട്ടിപ്പ് നടത്തി ലഭിക്കുന്ന പണം ആര്ഭാട ജീവിതത്തിന് വേണ്ടിയാണ് സുനില് ചെലവഴിച്ചിരുന്നതെന്ന് പോലീസ് പറഞ്ഞു.
